ⵜⵡⴰⵜⵜⵙ ⵜⵣⴷⵓⵖⵜ ⴰⴷ, ⵍⵉ ⵉⵏⵎⴰⵍⴰⵙ ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⵍⵎⴰⴷ (5 ⴽⵟⵓⴱⵕ) ⴰⵔ 13 ⴽⵟⵓⴱⵕ ⵍⵍⵉⵖ ⵏⵍⵍⴰ, ⴰⴷ ⵜⴱⴷⴷ ⴷⴰⵔ ⵜⵡⵓⵔⵉⵡⵉⵏ ⵜⵉⵎⵓⵟⵟⵓⵏⵉⵏ ⵍⵍⵉ ⵙⴽⵔⵏ ⵉⵎⵙⵏⴼⵍⵓⵍⵏ ⵉⵙⴳⵎⴰⵏⵏ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⵏ ⵜⵉⵍⴰⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⴰⴷ ⵜⵙⵡⵓⵔⵉ ⴰⴽⴷ ⵉⵎⴰⵙⵙⴰⵏⵏ ⵏ ⵢⵉⴳⵔ ⴰⴷ ⵡⵉⴷ ⵉⴹⴼⵕⵏ ⵉ ⵜⵎⵀⵍⴰ ⵏ "ⵊⵉⵏⵉ" ⵉⴹⴼⵕⵏ ⵉ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ ⵅⴼ ⴰⴷ ⵙⵙⴷⵓⵙⵏ ⵜⵉⵡⵓⵔⵉⵡⵉⵏ ⴰⴷ.
ⴳ ⵓⵎⵏⵉⴷ ⴰⴷ, ⵉⵏⵏⴰ ⵓⵏⵎⵀⴰⵍ ⵏ ⵓⵙⵏⵓⴱⴱⵛ ⴰⴷⵉⴷⴰⴽⵜⵉⴽ ⴷ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵏ, ⵉⴹⴼⵕⵏ ⵉ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵄⴱⴷ ⵙⵙⵍⴰⵎ ⵍⵅⵍⴼⵉ, ⵎⴰⵙⴷ ⵜⴰⵣⴷⵓⵖⵜ ⴰⴷ ⵜⵔⴰ ⴰⴷ ⵜⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙ ⵓⵙⵎⵔⵙ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵓⵙⵉⵡⴹ ⵍⵍⵉ ⵔⴰⴷ ⵉⵙⴼⴰⵍⴽⵉ ⴰⵙⵙⵍⴽⵎ ⵏ ⵓⵍⵎⴰⵏ ⵉ ⵜⴰⵣⵣⴰⵏⵉⵏ.
ⵉⵙⵙⵓⵎⴰⵏ ⵎⴰⵙⵙ ⵍⵅⵍⴼⵉ, ⴳ ⵡⴰⵡⴰⵍ ⵏⵏⵙ ⵉ ⵜⴰⴳⴳⵓⵔⵜ ⵜⴰⵎⴰⵣⵉⵖⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵉⵏⵖⵎⵉⵙⵏ, ⵎⴰⵙ ⵃⵢⵢⵍⵏ ⵉ ⵜⵣⴷⵓⵖⵜ ⴰⴷ ⵣⴳ 2021 ⵍⵍⵉⵖ ⵙⴽⵔⵏ ⵜⴰⵙⵓⵜⵍⵜ ⵉⵣⵡⴰⵔⵏ, ⴳ ⵓⴳⴳⴰⵔ ⵏ ⵉⵎⴰⵍⴰⵙⵙ, ⴹⴰⵕⵜ ⵏⵏⵙ ⵙⴽⵔⵏ ⴰⵙⵎⵓⵜⵜⴳ ⴰⵎⵏⵉ ⴰⵙⴳⴳⵯⴰⵙ ⵏ 2022 ⴳ ⵓⵙⵡⵉⵔ ⵏ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵉⵜⵏ ⴷ ⵉⵙⵓⴳⴰⵎ ⵉⵎⵓⵟⵟⵓⵏⵏ ⴳ ⵜⵣⴷⴰⵢⵜ ⵏⵏⵙⵏ ⴷ ⵉⵖⴰⵡⴰⵙⵏ ⵍⵍⵉ ⵉⵙⴽⵔ ⵓⵙⵉⵏⴰⴽ ⵜⵙⵖⵣⵏ ⵜⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ.
ⵉⵙⵎ ⴷ ⵎⴰⵙⴷ ⵜⴰⵙⵓⵜⵍⵜ ⴰⴷ, ⵍⵍⵉ ⴳ ⵍⵍⴰⵏ ⵉⵙⵍⵎⴰⴷⵏ ⵉⵎⵙⵏⴼⵍⵓⵍⵏ ⵏ 2021, ⵜⵔⴰ ⴰⴷ ⵜⵙⴽⵔ ⴽⵉⴳⴰⵏ ⵏ ⵉⵙⵓⴳⴰⵎ ⵉⵎⵓⵟⵟⵓⵏⵏ ⵉ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⴳ ⵉⵙⵡⵉⵔⵏ ⵉⵎⵣⵡⵓⵔⴰ ⵜⵙⵔⵙ ⵜⵏ ⴳⵔ ⵉⴼⴰⵙⵙⵏ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴼⴼⵖ ⵓⵍⴰ ⵙ ⵓⵖⴰⵡⴰⵙ ⵏ ⵓⴼⴰⵔⵙ ⵏ ⵉⵙⵓⴳⴰⵎ ⵢⴰⴹⵏⵉ ⴷ ⵉⵙⵎⵓⵜⴰⴳ ⵉ ⵉⵙⵍⵎⴰⴷⵏ ⴰⴹⵏⵉ.
ⴳ ⵜⵙⴳⴰ ⵏⵏⵙ, ⵜⵏⵏⴰ ⵜⵏⵎⵀⴰⵍⵜ ⵏ ⵓⵖⴰⵡⴰⵙ "ⵊⵉⵏⵉ", ⵉⵍⵀⴰⵎ ⵍⵄⵣⵉⵣⵉ, ⵎⴰⵙⴷ ⴰⵖⴰⵡⴰⵙ ⴰⴷ ⵔⴰⴷ ⵢⴰⵡⵙ ⴽⵉⴳⴰⵏ ⵉ ⵉⵙⵍⵎⴰⴷⵏ ⴼⴰⴷ ⴰⴷ ⵙⵙⵔⵎⴰⵙⵏ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵜⵏ ⴳ ⵜⴷⴰⵍⵡⵉⵏ, ⵜⵉⵏⵉ ⵎⴰⵙ ⵙⴽⵔⵏ ⵜⵉⴳⴰⵔⵡⵉⵏ ⴰⴷ ⴽⵉⴳⴰⵏ ⵏ ⵉⵖⴰⵡⴰⵙⵏ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵜⵉⵏⵉ ⵎⴰⵙⴷ ⵜⴰⵎⵀⵍⴰ ⵏ "ⵊⵉⵏⵉ" ⵔⴰⴷ ⵜⵙⵡⵓⵔⵉ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴼⴰⴷ ⴰⴷ ⵙⵙⵉⴳⵓⴷⵏ ⵉⵙⵓⴳⴰⵎ ⵉⵎⵓⵟⵟⵓⵏⵏ, ⵙⴱⵓⵖⵍⵓⵏ ⵜⴰⵡⵡⵓⵔⵉ ⵙⵉⵙⵏ ⵖⵉⴷ ⵙ ⵍⴳⴷⴷⴰⵎ.
ⵜⵉⵏⵉ ⵜⵙⵍⵎⴰⴷⵜ ⵏ ⵜⵎⴰⵣⵉⵖⵜ ⴳ ⵜⵉⵏⵎⵍ "ⵓⵎⵎ ⴰⵢⵎⴰⵏ" ⴳ ⵉⴽⵉⵍ (ⴱⵔⴽⴰⵏ), ⵕⴰⵊⴰ ⵎⵔⵣⵓⵇⵉ, ⵍⵍⵉ ⵉⴳⴰⵏ ⵣⴳ ⵉⵎⴷⵔⴰⵡⵏ ⴳ ⵜⵣⴷⵓⵖⵜ ⴰⴷ, ⵎⴰⵙⴷ ⵜⵓⴳⵜⵜ ⵏ ⵉⵎⵙⵏⴼⵍⵓⵍⵏ ⴳ ⵉⵙⵓⴳⴰⵎ ⵉⵎⵓⵟⵟⵓⵏⵏ ⵉⵥⵍⵉⵏ ⵙ ⵜⴰⵍⵍⴰⵙⵜ ⴷ ⵓⵙⴼⵜⵉ ⴷ ⵜⵊⵕⵕⵓⵎⵜ ⵓⵍⴰ ⴰⵔⵎⴰⵙ ⴰⵎⵉⵡⴰⵏ, ⴷⵔⴰⵏ ⴳ ⵓⵖⴰⵡⴰⵙ ⴰⴷ.
ⵢⵉⵍⵉ ⴳ ⵓⵖⴰⵡⴰⵙ ⴰⴷ ⵜⵓⴳⵜ ⵏ ⵉⵙⴼⵙⴰⵔⵏ ⴷ ⵉⵙⵎⵓⵜⵜⴳⵏ, ⵉⴷⵔⴰ ⴳⵉⵙⵏ ⵉⵙⵎⴰⵄⵉⵍ ⵅⵔⴰⵣⵉ, ⵣⴳ (ⵜⴰⵎⵀⵍⴰ ⵏ ⵊⵉⵏⵉ), ⴷ ⵉⵎⵔⵣⴰ ⴳ ⵡⴰⵎⵎⴰⵙ ⴰⴷⵉⴷⴰⴽⵜⵉⴽ ⴷ ⵓⵖⴰⵡⴰⵙ ⴰⴱⵉⴷⴰⴳⵓⵊ ⵉⴹⴼⵕⵏ ⵉ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.