ⵙⵜⵉⴼⴰⵏ ⵙⵉⵊⵓⵔⵏⵉ : ⴼⵕⴰⵏⵚⴰ ⵜⵏⵏⴰⵍ ⵓⵖⴰⵡⴰⵙ ⵏ ⵓⵙⵏⴱⴹ ⴰⵏⵉⵎⴰⵏ ⵜⵏⵏⴰ ⵎⴰⵙ ⵉⴳⴰ ⴰⵣⵎⵣ ⵏ ⵓⵣⴰⵢⴷ ⵖⵔ ⴷⴰⵜ

26 ⴱⵕⴰⵢⵕ 2024 Version Imprimable

ⵕⵕⴱⴰⵟ - ⵉⵙⵎⴰⵢⴰⵏⴰ ⵓⵎⴰⵡⵙⴰⵙ ⵏ ⵓⵕⵓⴱⴱⴰ ⴷ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴰⴼⵕⴰⵏⵙⴰⵡⵉ ⵙⵜⵉⴼⴰⵏ ⵙⵉⵊⵓⵔⵏⵉ ⵡⴰⵙⵙ ⵏ ⵓⵢⵏⴰⵙ ⴳ ⵕⵕⴱⴰⵜ ⴰⵙⴷⴷⵉⴷ ⵏ ⵡⴰⵏⵏⴰⵍ ⵏ ⵜⴰⵎⴰⵣⵉⵔⵜ ⵏⵏⵙ " ⴰⵎⴰⴼⴰⵡ ⴷ ⵜⵉⵙⵉ " ⵉ ⵓⵖⴰⵡⴰⵙ ⵏ ⵓⵙⵏⴱⴹ ⴰⵏⵉⵎⴰⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵉⵙⴷⴷⵉⴷ ⵎⴰⵙ ⵉⴳⴰ ⴰⵣⵎⵣ ⵉ ⴼⵕⴰⵏⵚⴰ ⵏ ⵓⵣⴰⵢⴷ ⵖⵔ ⴷⴰⵜ ⴳ ⵜⵎⵙⴰⵔⵜ ⴰⴷ .

ⵉⵙⵙⴽⵜⵉ ⵎⴰⵙⵙ ⵙⵉⵊⵓⵔⵏⵉ ⴳ ⵜⵉⵏⴰⵡⵜ ⵏ ⵜⵏⵖⵎⴰⵙⵜ ⵉⵜⵜⵓⴷⴰⵔⵏ ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴱⵢⵉⵏ ⵣⴷⵖⵉⵏ ⴳ ⴱⵕⵕⴰ ⵏⴰⵙⵕ ⴱⵓⵕⵉⵟⴰ ⴳ ⵜⴳⵉⵔⴰ ⵏ ⵉⵎⴹⴰⴽⴰⵕⵏ ⵎⴰⵙ ⴼⵕⴰⵏⵚⴰ ⵜⴰⵎⴰⵣⵉⵔⵜ ⵜⴰⵎⴰⵣⵡⴰⵔⵓⵜ ⵜⵏⵏⴰⵍ ⵓⵖⴰⵡⴰⵙ ⵏ ⵓⵙⵏⴱⴹ ⴰⵏⵉⵎⴰⵏ ⴳ ⵓⵙⴳⴳⴰⵙ 2007 ⵉⵙⵓⵍ ⵉⵏⵏⴰ ⵎⴰⵙ " ⴳ ⵓⵙⴰⵜⵉ ⵏ ⵜⵔⵏⵓⵏⵜ ⵜⵎⵥⵍⴰ ⴳ ⵓⵙⵖⵏ ⴰⴷ ⵢⵉⵡⴹ ⵍⵡⵇⵜ ⴰⴷ ⵜⵣⴰⵢⴷ ⵖⵔ ⴷⴰⵜ ".

ⵉⵙⴷⴷⵉⴷ ⵎⴰⵙ ⵜⴰⵏⵣⵔⵓⴼⵜ ⵜⴳⴰ ⵜⵎⵙⴰⵔⵜ " ⵜⵉⵍⵉⵜ " ⵖⵓⵔ ⵏ ⵍⵎⵖⵔⵉⴱ ⴷ ⵉⵎⵖⵔⴰⴱⵢⵉⵏ ⵉⴼⵔⴰ ⵢⵉⵏⵏⴰ ⵎⴰⵙ " ⵜⵔⴰ ⴼⵕⴰⵏⵚⴰ ⴰⴼⵙⵙⴰⵢ ⴰⵣⵔⴼⴰⵏ ⴷ ⵓⵙⵔⵜⴰⵏ ⵓⵎⵖⵍⴰⵍ ⵉⵇⴱⵍ ⵙⴳ ⵜⴼⵓⵍⵉⵏ " ⵖⵉⴽ ⵏⵏⴰⵏ ⵜⵖⵜⴰⵙⵉⵏ ⵏ ⵓⵙⵇⵇⵓⵎ ⵏ ⵜⵏⴼⵔⵓⵜ ⵉⴹⴼⴰⵔⵏ ⵉ ⵜⵎⵜⵜⴰ ⵉⵎⵓⵏ.

ⵉⵙⵓⵍ ⵉⵏⵏⴰ ⵎⴰⵙ " ⴼⵕⴰⵏⵙⴰ ⵜⵔⴰ ⵓⵍⴰ ⵓⵣⴰⵢⴷ ⵖⵔ ⴷⴰⵜ ⴷ ⵓⵎⵎⴰⵣ ⴳ ⵜⴰⵏⴰⵢⵜ ⵏ ⵉⵙⴱⵖⵓⵔⵏ ⴷ ⵜⵜⵓⵔⴰⵜ ⵏ ⵉⵎⵣⴷⴰⵖⵏ " ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴰⴳⵍⴷⵉⵜ ⵙⴰⵍⴰⵡⵏ ⴰⴽⴽⵯ ⴳ ⵉⴳⵔⵏ ⵏ ⵓⵙⵍⵎⴰⴷ ⴷ ⴰⴷⵍⵙⴰⵏ ⵉⵙⵙⴽⵜⵉ ⵜⵉⵍⵉⵜ ⵏ ⵙⵏⴰⵜ ⵜⵉⵏⵎⵍⵏ ⵜⵉⴼⵕⴰⵏⵚⴰⵡⵉⵏ ⴳ ⴷⴷⴰⵅⵍⴰ ⴷ ⵍⵄⵢⵓⵏ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%99%E2%B5%9C%E2%B5%89%E2%B4%BC%E2%B4%B0%E2%B5%8F-%E2%B5%99%E2%B5%89%E2%B5%8A%E2%B5%93%E2%B5%94%E2%B5%8F%E2%B5%89-%E2%B4%BC%E2%B5%95%E2%B4%B0%E2%B5%8F%E2%B5%9A%E2%B4%B0-%E2%B5%9C%E2%B5%8F%E2%B5%8F%E2%B4%B0%E2%B5%8D-%E2%B5%93%E2%B5%96%E2%B4%B0%E2%B5%A1%E2%B4%B0%E2%B5%99-%E2%B5%8F-%E2%B5%93%E2%B5%99%E2%B5%8F%E2%B4%B1%E2%B4%B9-%E2%B4%B0%E2%B5%8F%E2%B5%89%E2%B5%8E%E2%B4%B0%E2%B5%8F-%E2%B5%9C%E2%B5%8F%E2%B5%8F%E2%B4%B0-%E2%B5%8E%E2%B4%B0%E2%B5%99-%E2%B5%89%E2%B4%B3%E2%B4%B0-%E2%B4%B0%E2%B5%A3%E2%B5%8E%E2%B5%A3%C2%A0-%E2%B5%8F-%E2%B5%93%E2%B5%A3%E2%B4%B0%E2%B5%A2%E2%B4%B7-%E2%B5%96%E2%B5%94