Published on MAPNews (https://www.mapnews.ma/am)

Accueil > ⵜⵓⵚⴽⴰ ⵏ ⵉⵖⴰⵔⴰⵙⵏ ⴳ ⵍⵃⴰⵡⵣ ⴷⴼⴼⵉⵔ ⵏ ⵜⵣⵓⵣⵜ, ⵜⵓⵎⵥ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⴰⵖⴰⵔⴰⵙ ⵏⵏⵙ

ⵜⵓⵚⴽⴰ ⵏ ⵉⵖⴰⵔⴰⵙⵏ ⴳ ⵍⵃⴰⵡⵣ ⴷⴼⴼⵉⵔ ⵏ ⵜⵣⵓⵣⵜ, ⵜⵓⵎⵥ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⴰⵖⴰⵔⴰⵙ ⵏⵏⵙ

04 ⵛⵓⵜⴰⵏⴱⵉⵔ 2024 Version Imprimable
ⵡⵉⵔⴳⴰⵏ (ⵜⴰⵙⴳⴰ ⵏ ⵍⵃⴰⵡⵣ) - ⵜⴳⵔⴰⵡⵍ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⵙ ⵓⵖⴰⵔⴰⵙ ⵏⵏⵙ ⵉⵄⴷⵍⵏ ⴷⴼⴼⵉⵔ ⵏ ⵜⵡⵡⵓⵔⵉⵡⵉⵏ ⵏ ⵜⵓⵚⴽⴰ ⵏ ⵉⵖⴰⵔⴰⵙⵏ ⵍⵍⵉ ⵜⵙⴽⴽⵯⴰⵟⵟⴰ ⵜⵣⵓⵣⵜ ⵏ ⵍⵃⴰⵡⵣ ⵍⵍⵉ ⵢⵙⵎⴰⵏⵏ ⵜⴳⵔⴰⵡⵉⵏ ⴷ ⵉⴹⵡⵡⴰⵕⵏ ⵏ ⵜⵙⴳⴰ ⵙ ⵉⵎⵎⴰⵙⵏ ⵉⵖⵔⵎⴰⵏⵉⵏ ⴷ ⵉⵙⴼⵙⵙⵓⵙⵏ ⴰⵏⵢⵓⴷⴷⵓ.

ⵜⵓⵚⴽⴰ ⵏ ⵉⵖⴰⵔⴰⵙⴰⵏ ⵜⵙⵙⵉⵡⵙ ⴳ ⵜⵏⴽⵔⴰ ⵙ ⵓⵎⵓⵙⵙⵓ ⴰⵎⵙⵖⵏⵣⵉ ⴷ ⴰⴷⵎⵙⴰⵏ ⴰⴷⵖⵔⴰⵏ, ⵙⵍⴰⵡⴰⵏ ⴰⴽⴽⵯ ⴰⵎⵓⵙⵙⵓ ⴰⵎⵍⴰⵍⵍⴰⵢ ⵍⵍⵉ ⵢⵄⴷⵍⵏ ⵉ ⵜⵎⵙⵙⵏⵜⵉⵜⵉⵏ ⵜⵉⴷⵖⵔⴰⵏⵉⵏ ⴷ ⵜⵉⵣⵣⵓⵍⴰ ⵉⵎⵥⵥⵉⵏ.

ⴳ ⵓⵎⵏⵉⴷ ⴰⴷ ⴰⴷ ⵉⴽⵯⵛⵎ ⵓⵙⵏⵜⵉ ⵏ ⵜⵙⵉⵥⴹⵕⵜ ⵏ ⵓⵖⴰⵔⴰⵙ ⴰⵎⴰⵢⵏⵓ ⵡⵉⵙⵙ ⵙⴰ ⴳⵔ ⵜⴰⵃⵏⵏⴰⵡⵜ ⴷ ⵜⴰⵔⵓⴷⴰⵏⵜ, ⵙⵍⴰⵡⴰⵏ ⴰⴽⴽⵯ ⴰⵢⵢⴰⵡ ⵉⵙⵎⴰⵏⵏ ⵡⵉⵔⴳⴰⵏ ⴷ ⵜⴰⵍⴰⵜ ⵏ ⵢⵄⵇⵓⴱ, ⵎⴰ ⵢⴰⴷ ⵉⴳⴰⵏ ⵢⴰⵏ ⵓⵙⵏⵜⵉ ⵉⵅⴰⵜⴰⵔⵏ ⵏ ⵓⵖⴰⵡⴰⵙ ⵏ ⵜⵓⵥⵡⴰⵢⵜ ⵏ ⵜⵙⴳⴰ ⵏ ⵍⵃⴰⵡⵣ.

ⴳ ⵉⴳⵔ ⴰⴷ, ⵉⵏⵏⴰ ⵕⴹⵡⴰⵏ ⴰⵢⵜ ⴷⵉⵡⴰⵏ, ⴱⴰⴱ ⵏ ⵢⴰⵜ ⵜⴳⵎⵎⵉ ⵜⴰⵎⵍⴰⵍⵍⴰⵢⵜ ⴳ ⵡⵉⵔⴳⴰⵏ ⵎⴰⵙ ⵜⵏⴽⵔⴰ ⵙ ⵉⵖⴰⵔⴰⵙⵏ ⵜⴷⵔⴰ ⴳ ⵜⵏⴽⵔⴰ ⵙ ⵜⵎⴰⵍⵍⴰⵢⵜ ⴳ ⵜⵙⴳⴰ, ⵉⵔⵏⴰ ⵢⵏⵏⴰ ⵎⴰⵙ "ⵙ ⵜⵡⵡⵓⵔⵉⵡⵉⵏ ⵏ ⵜⵓⵚⴽⴰ ⴷ ⵓⵙⵙⵄⴷⵍ ⵏ ⵉⵖⴰⵔⴰⵙⵏ, ⵉⵔⵅⴰ ⵖⵉⵍ ⴰⴷ ⵅⴼ ⵉⵎⵍⴰⵍⵍⴰⵢⵏ ⴰⴷ ⵍⴽⵎⵏ ⵙ ⵜⴳⵎⵎⵉ ⵜⴰⵎⵍⴰⵍⵍⴰⵢⵜ".

"ⴰⵙⴰⵖⵓⵍ ⵏ ⵜⵉⵣⵉ ⵏ ⵉⵖⴰⵔⴰⵙⵏ ⵢⵓⵊⵊⴰ ⵢⴰⵏⵖ ⴰⴷ ⵏⵙⵙⴳⵔⵉⵡⵍ ⴰⵎⵓⵙⵙⵓ ⴰⵎⵍⴰⵍⵍⴰⵢ ⴷ ⴰⴷ ⵏⵙⴷⵓⵙ ⵜⵉⵏⵏⵓⵣⵖⴰ ⵏ ⵜⵙⴳⴰ ⵢⴰⴷ ⵓⵍⴰ ⵓⵍⴽⵉⵎ ⵏ ⵉⵎⵍⴰⵍⵍⴰⵢⵏ ⵙ ⵉⴷⵖⵔⴰⵏ ⵍⵍⵉⵖ ⵍⵍⴰⵏ ⵉⵎⵓⵖⵍⵉⵏ ⵏ ⵉⴷⵔⴰⵔⵏ ⵉⴼⵓⵍⴽⵉⵏ ⴷ ⵉⵕⵃⵎⵏ", ⵎⴰ ⵢⴰⵏ ⵉⵏⵏⴰ ⴳ ⵢⴰⵜ ⵜⵙⴳⵓⵔⵉ ⵉ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵜⵏⵖⵎⴰⵙⵜ (ⵍⴰⵎⴰⴱ).

ⵉⴼⵔⴰ ⵢⵏⵏⴰ ⵎⴰⵙ ⵜⵓⵚⴽⴰ ⵏ ⵉⵖⴰⵔⴰⵙⵏ ⴳ ⵉⴷⵖⴰⵔⵏ ⵏ ⵉⴷⵔⴰⵔⵏ ⵜⴳⴰ ⵢⴰⵜ ⵜⵎⵙⵙⵉⵍⵉⵜ ⵜⴰⵅⴰⵜⴰⵔⵜ ⵏ ⵜⴳⵎⵉ ⵜⴰⴷⵎⵙⴰⵏⵜ ⴳ ⵜⵙⴳⴰ, ⵎⴰ ⵢⴰⴷ ⵢⵉⵡⵉⵏ ⵉⵣⵎⵣⵏ ⵉⵎⴰⵢⵏⵓⵏⵏ ⵉ ⵢⵄⵔⵔⵉⵎⵏ ⴰⴼ ⴰⴷ ⵙⵙⵓⴼⵖⵏ ⵉⵙⵏⵜⵉⵏ ⵉⵎⵍⴰⵍⵍⴰⵢⵏ ⵉⵅⴰⵜⴰⵔⵏ ⵣⵓⵏⴷ ⵉⵎⵎⴰⵙⵏ ⵏ ⵜⵎⵙⴽⵙⴰⵍⵉⵏ ⴷ ⵉⵔⵣⴰⴼⵏ ⵉⵎⴰⵏⴰⵔⵏ.

ⴳ ⵓⵣⵎⵣⵣⵓ ⵢⴰⴷ, ⵉⵖⵕⴰ ⵉ ⵢⵄⵔⵔⵉⵎⵏ ⵏ ⵜⵙⴳⴰ "ⴰⴷ ⵓⵔ ⴰⵊⵊⵉⵏ ⵜⵙⴽⵔⴰⵡⵜ ⵏ ⵜⵔⵊⵉⵜⵉⵏ ⴷ ⵜⴽⴰⵢⵍⴰⵍⵉⵏ ⵏⵏⵙⵏ, ⴷ ⴰⴷ ⵓⵔ ⴱⴷⴷⵏ ⴷⴰⵜ ⵜⵏⵥⵕⵉⵡⵉⵏ".

ⴰⵎⵎⴰ ⵕⴰⵛⵉⴷ ⴱⵓⵜⵙⴰⴼⴰⵜ, ⴰⵃⵊⵊⴰⵎ ⵏ ⵜⴳⵔⴰⵡⵜ ⵏ ⵡⵉⵔⴳⴰⵏ, ⵉⵎⵍⴰ ⴰⵎⵉⵔⵉ ⵏⵏⵙ ⵍⵍⵉⵖ ⵉⵥⵕⴰ ⴰⵍⴰⵢ ⵏ ⵜⵓⵚⴽⴰ ⵏ ⵉⵖⴰⵔⴰⵙⵏ ⵉⵜⵜⵓⵙⴽⴰⵔⵏ ⴳ ⵙⴰⵜⵉ ⵏ ⵜⵓⴳⴳⴰⵣ ⵉⴹⴼⴰⵕⵏ ⵜⴰⵣⵓⵣⵜ.

"ⴰⵖⴰⵔⴰⵙ ⵉⵣⴷⵉⵏ ⵜⴰⵃⵏⵏⴰⵡⵜ ⴷ ⵜⵔⵓⴷⴰⵏⵜ ⵉⴳⴰ ⵢⴰⴷⵍⵍⵉ ⵢⴰⵜ ⵜⵏⵥⵕⵜ ⵜⴰⵎⵇⵕⴰⵏⵜ, ⵙⵍⴰⵡⴰⵏ ⴰⴽⴽⵯ ⴳ ⵜⴳⵔⵙⵜ ⵍⵍⵉⵖ ⴰⵔ ⵢⴰⴷⵍⵍⵉ ⵢⵜⴱⴱⵉ ⵓⵏⵥⴰⵕ ⵉⵖⴰⵔⴰⵙⵏ", ⵎⴰ ⵢⴰⴷ ⵉⵏⵏⴰ, ⵉⴼⵔⴰ ⵢⵏⵏⴰ ⵎⴰⵙ ⴰⵢⵢⴰⵡ ⵏ ⵓⵖⴰⵔⴰⵙ ⴰⴷ ⵉⵄⴷⵍ ⵉ ⵜⴳⵎⵉ ⴰⵏⴰⵎⵓⵏ ⴷ ⴰⴷⵎⵙⴰⵏ ⵏ ⵜⵙⴳⴰ.

ⵉⵙⵏⵉⵎⵎⵔ ⵎⴰⵙⵙ ⴱⵓⵜⵙⴰⴼⴰⵜ ⴽⵔⴰ ⵢⴳⴰⵜⵜ ⵢⴰⵏ ⵉⴷⵔⴰⵏ ⴳ ⵜⵓⴳⴳⴰⵣ ⵏ ⵜⵓⵚⴽⴰ, ⴷ ⵉⵎⵍⴰ ⵜⵉⵔⴰⵜ ⵏⵏⵙ ⴰⴷ ⵔⵏⵓⵏ ⵉⵙⵏⵜⵉⵏ ⴰⴷ ⴷ ⴰⴷ ⴰⵡⵉⵏ ⵉⵖⵓⵍⵏ ⵏⵏⵙⵏ ⴳ ⵉⴳⵔ ⵏ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⴰⴷⵎⵙⴰⵏⵜ ⴳ ⵜⵙⴳⴰ.

Source URL: https://www.mapnews.ma/am/actualites/%E2%B4%B0%E2%B5%8F%E2%B5%8E%E2%B5%8F%E2%B4%B0%E2%B4%B9/%E2%B5%9C%E2%B5%93%E2%B5%9A%E2%B4%BD%E2%B4%B0-%E2%B5%8F-%E2%B5%89%E2%B5%96%E2%B4%B0%E2%B5%94%E2%B4%B0%E2%B5%99%E2%B5%8F-%E2%B4%B3-%E2%B5%8D%E2%B5%83%E2%B4%B0%E2%B5%A1%E2%B5%A3-%E2%B4%B7%E2%B4%BC%E2%B4%BC%E2%B5%89%E2%B5%94-%E2%B5%8F-%E2%B5%9C%E2%B5%A3%E2%B5%93%E2%B5%A3%E2%B5%9C-%E2%B5%9C%E2%B5%93%E2%B5%8E%E2%B5%A5-%E2%B5%9C%E2%B4%B7%E2%B5%89%E2%B5%8F%E2%B4%B0%E2%B5%8E%E2%B5%89%E2%B5%9C-%E2%B5%9C%E2%B4%B0%E2%B4%B7%E2%B5%8E%E2%B5%99%E2%B4%B0%E2%B5%8F%E2%B5%9C-%E2%B4%B0%E2%B5%96%E2%B4%B0%E2%B5%94%E2%B4%B0%E2%B5%99-%E2%B5%8F%E2%B5%8F%E2%B5%99