Published on MAPNews (https://www.mapnews.ma/am)

Accueil > ⵉⵏⴰⵡ ⵏ ⴰⵊⴷⵉⵔ: ⵜⴰⵙⵔⵜⵉⵜ ⵜⴰⴳⵍⴷⴰⵏⵜ ⵏ ⵜⵏⴰⵢⵜ ⵉⴼⵓⵍⴽⵉⵏ ⵉⵔⴰⵏ ⴰⴷ ⵜⴰⵙⵉ ⵙ ⵜⵎⴰⴳⵉⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵏ

ⵉⵏⴰⵡ ⵏ ⴰⵊⴷⵉⵔ: ⵜⴰⵙⵔⵜⵉⵜ ⵜⴰⴳⵍⴷⴰⵏⵜ ⵏ ⵜⵏⴰⵢⵜ ⵉⴼⵓⵍⴽⵉⵏ ⵉⵔⴰⵏ ⴰⴷ ⵜⴰⵙⵉ ⵙ ⵜⵎⴰⴳⵉⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵏ

16 ⴽⵟⵓⴱⵕ 22019 - par : = ⵢⵓⵔⴰ ⵜ: ⵍⵎⵚⵟⴰⴼⴰ ⵄⵢⵢⴰⵛ = Version Imprimable
ⵕⵕⴱⴰⵟ - ⵙ ⵓⵔⵖ ⴰⵙ ⵉⵜⵜⵓⵔⴰ ⵉⵏⴰⵡ ⴰⴳⵍⴷⴰⵏ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴳ ⴰⵊⴷⵉⵔ ⴰⵙⵙ ⵏ 17 ⴽⵟⵓⴱⵕ 2011, ⵍⵍⵉⵖ ⵉⵙⵔⵙ ⵜⵓⵚⴽⵉⵡⵉⵏ ⵏ ⵍⵎⵖⵔⵉⴱ ⵏ ⵜⵎⴰⴳⵉⵜ ⵜⵎⴰⵏⴰⵡⵜ ⵏ ⵎⵛⵜⴰ ⵏ ⵉⵙⴳⵓⵎⵏ ⵏⵏⵙ, ⴷ ⵜⵥⵉⴹⴰⵕ ⵏ ⵓⵡⴰⵏⴽ ⴰⵎⵖⵔⴰⴱⵉ ⴰⴷ ⵉⵙⵔⵙ ⵜⵙⵔⵜⵉⵜ ⵏ ⵜⵏⴰⵢⵜ ⵉⴼⵓⵍⴽⵉⵏ ⵉⵔⴰⵏ ⴰⴷ ⵜⵏⴽⵔ ⵙ ⵜⴷⵍⵙⴰ ⵜⵎⴰⵣⵉⵖⵜ ⴷ ⵉⴳⵉⵜⵉ ⵏⵏⵙ.

ⵢⵉⵡⵉⴷ ⵓⵙⴽⴽⵉⵏ ⴰⵎⵣⵔⵓⵢ ⴰⴷ ⵉⵙⵓⴼⵖⵏ ⵉⵅⴰⵜⴰⵔⵏ ⴳ ⵉⴳⵔ ⵏ ⵓⵔⵣⵣⵓ ⵅⴼ ⵜⵓⵜⵍⴰⵢⵜ ⴷ ⵜⵡⵏⵏⵉⵜⵉⵏ ⵜⵏⴰⵥⵓⵕⵉⵏ ⴷ ⵜⴷⵍⵙⴰ ⵜⵎⴰⵣⵉⵖⵜ, ⴷ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴷ ⵜⵙⵏⵙⵉ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ.

ⴳ ⵓⵣⵎⵎⵣⵓ ⴷⵖ, ⵜⵏⵏⴰ ⵅⴰⴷⵉⵊⴰ ⵄⴰⵣⵉⵣ ⴳ ⵓⴷⵍⵉⵙ ⵏⵏⵙ "ⵜⴼⵓⵍⵉⵏ ⵙⴳ ⵜⴷⵍⵙⴰ ⵜⵎⴰⵣⵉⵖⵜ ⵜⴰⵜⵔⴰⵜ", ⵎⴰ ⵢⴰⴷ ⵉⴳⴰⵏ ⵢⴰⵜ ⵜⵥⵕⵉⴳⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⵎⴰⵣⵉⵖⵜ, ⵎⴰⵙ ⵉⵏⴰⵡ ⵏ ⴰⵊⴷⵉⵔ ⵉⴳⴰ ⵢⴰⵜ ⵜⵖⴰⵡⵙⴰ ⵉⴷⴷⵓⵔⵏ ⴳ ⵓⵎⵣⵔⵓⵢ ⵏ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⵏ ⵜⵎⴰⵣⵉⵖⵜ ⴰⵎⵎ ⵜⵓⵜⵍⴰⵢⵜ ⴷ ⵜⴷⵍⵙⴰ, ⴰⵛⴽⵓ ⵉⵎⵍⴰ ⵢⵏⴰⵡ ⴰⴷ ⵉⵎⵏⵣⴰⵢⵏ ⵉⴷⵍⵙⴰⵏ ⵍⵍⵉ ⵢⴳⴰⵏ ⴰⵃⵕⵛ ⵉⴷⴷⵓⵔⵏ ⵏ ⵜⴰⴷⵉⵎⵓⵇⵕⴰⵟⵉⵜ ⵜⵓⵜⵍⴰⵢⵜ ⴷ ⵜⴰⴷⵍⵙⴰⵏⵜ ⴳ ⵍⵎⵖⵔⵉⴱ.

ⵉⵎⵢⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⵎⴰⵣⵉⵖⵜ ⴰⴷ ⵉⵙⴽⵜⵉ ⵡⵙⴽⵜⵉ ⵏ ⵓⵊⴷⵉⵔ ⴽⵓ ⵡⴰⵙⵙ ⴷⴷⵓ ⵏ ⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ. ⵅⴼ ⵖⵉⴽⴰⵏⵏ, ⴰⵔ ⵉⵙⴽⵜⵉ ⵡⵙⵉⵏⴰⴳ ⴰⵙⵙ ⵏ 17 ⵏ ⵡⴰⵢⵢⵓⵔ ⴰⴷ ⴰⵙⴽⵜⵉ ⵡⵉⵙⵙ 10 ⵏ ⵉⵏⴰⵡ ⵏ ⵓⵊⴷⵉⵔ.

ⴳ ⵢⴰⵜ ⵜⵙⴳⵓⵔⵉ ⵉ ⵜⵙⵏⵓⵔⴰⵢⵜ ⵜⵎⵖⵔⴰⴱⵉⵜ ⵏ ⵉⵏⵖⵎⵉⵙⵏ, ⵉⵏⵏⴰ ⵎⴰⵙⵙ ⴱⵏ ⵄⵉⵙⴰ ⵢⵛⵛⵓ, ⴰⵙⵍⵎⴰⴷ ⴰⵎⵔⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⵎⴰⵣⵉⵖⵜ, ⵎⴰⵙ ⵜⴼⵔⵙⴰⴼⵜ ⵉⵖⴱⴰⵏ ⵏ ⵓⵙⴼⵓⴳⵍⵓ ⵏ ⵉⵏⴰⵡ ⵏ ⵓⵊⴷⵉⵔ ⵉⴳⴰ ⵜ ⵜⴰⵙⴼⵓⴳⵍⴰ ⵏ « ⵓⵎⵙⴼⵔⵓ » ⴰⴷⵍⵙⴰⵏ ⵉⵍⵍⴰⵏ ⴳ ⵍⵎⵖⵔⵉⴱ ⵙⴳ ⵍⵍⵉⵖ ⵉⴳⴳⴰⵡⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⴷⴰⴱⵓ.

ⵉⵙⴷⴷⵉⴷ ⵎⴰⵙ ⵢⵛⵛⵓ ⵎⴰⵙ ⵉⵙⵙⵏ ⵍⵎⵖⵔⵉⴱ ⴰⵎⵙⴼⵔⵓ ⴰⵙⵔⵜⴰⵏ ⴷ ⵓⵙⵍⴳⴰⵏ ⵉⴳⴳⵔⵏ ⵜⵉⴼⵓⵍⵉⵏ ⵜⵉⴷⵎⵙⴰⵏⵉⵏ ⴷ ⵜⵓⵜⵍⴰⵢⵉⵏ, ⴷ ⵜⵣⵔⵉ ⵜⴽⵍⵉⵜ ⵜⵎⵣⵡⴰⵔⵓⵜ ⵏ ⵓⵎⵙⴼⵔⵓ ⵢⴰⴷ ⴳ ⵓⵙⴳⴳⵯⴰⵙ 2001 ⵍⵍⵉⵖ ⵉⵙⴳⵓⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵃⴼⴹ ⵕⴱⴱⵉ, ⴰⵍⵍⴰⵙ ⵏ ⵜⵓⵙⵙⵏⴰ ⵙ ⵓⴼⵔⴷⵉⵙ ⴰⴷⵎⵙⴰⵏ ⴰⵎⴰⵣⵉⵖ, ⵎⴰ ⵢⴰⴷ ⵉⵍⵍⴰⵏ ⴰⵎⵎⴰⵙ ⵏ ⵉⴼⵔⴷⴰⵙ ⵏ ⵜⴷⵍⵙⴰ ⵜⵎⵖⵔⴰⴱⵉⵜ.
 

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%89%E2%B5%8F%E2%B4%B0%E2%B5%A1-%E2%B5%8F-%E2%B4%B0%E2%B5%8A%E2%B4%B7%E2%B5%89%E2%B5%94-%E2%B5%9C%E2%B4%B0%E2%B5%99%E2%B5%94%E2%B5%9C%E2%B5%89%E2%B5%9C-%E2%B5%9C%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F%E2%B5%9C-%E2%B5%8F-%E2%B5%9C%E2%B5%8F%E2%B4%B0%E2%B5%A2%E2%B5%9C-%E2%B5%89%E2%B4%BC%E2%B5%93%E2%B5%8D%E2%B4%BD%E2%B5%89%E2%B5%8F-%E2%B5%89%E2%B5%94%E2%B4%B0%E2%B5%8F-%E2%B4%B0%E2%B4%B7-%E2%B5%9C%E2%B4%B0%E2%B5%99%E2%B5%89-%E2%B5%99-%E2%B5%9C%E2%B5%8E%E2%B4%B0%E2%B4%B3%E2%B5%89%E2%B5%9C-%E2%B4%B7-%E2%B5%9C%E2%B4%B7%E2%B5%8D%E2%B5%99%E2%B4%B0