Published on MAPNews (https://www.mapnews.ma/am)

Accueil > ⵜⴰⵎⴰⵖⵓⵏⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴷⴷⵓⵔ ⴰⵎⵎ ⴰⴷⴷⴰⴷ ⵍⵍⵉⵖ ⵢⴰⴷ ⵍⵍⵉ ⵜⵍⵍⴰ ⴷⴰⵜ ⵏ ⵉⵏⴰⵡ ⵏ ⴰⵊⴷⵉⵔ (ⵎⴰⵙⵙ ⴱⵓⴽⵓⵙ)

ⵜⴰⵎⴰⵖⵓⵏⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴷⴷⵓⵔ ⴰⵎⵎ ⴰⴷⴷⴰⴷ ⵍⵍⵉⵖ ⵢⴰⴷ ⵍⵍⵉ ⵜⵍⵍⴰ ⴷⴰⵜ ⵏ ⵉⵏⴰⵡ ⵏ ⴰⵊⴷⵉⵔ (ⵎⴰⵙⵙ ⴱⵓⴽⵓⵙ)

21 ⴽⵟⵓⴱⵕ 2020 - par : ⵢⵓⵔⴰ ⵜ  ⴰⵍⵎⵓⵚⵟⴰⴼⴰ ⵄⵢⵢⴰⵛ  Version Imprimable
ⵕⵕⴱⴰⵟ - ⵉⵏⵏⴰ ⵎⴰⵙⵙ ⵃⵎⴰⴷ ⴱⵓⴽⵓⵙ, ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵎⴰⵙ ⵜⵎⵖⵓⵏⵜ ⵏ ⵓⵙⵉⵏⴰⴳ ⵜⴷⴷⵓⵔ ⴰⵎⵎ ⴰⴷⴷⴰⴷ ⵍⵍⵉⵖ ⵢⴰⴷ ⵍⵍⵉ ⵜⵍⵍⴰ ⵜⵎⴰⵣⵉⵖⵜ ⴷⴰⵜ ⵏ ⵉⵏⴰⵡ ⵢⴰⵜⵜⵓⵢⵏ ⵏ ⴰⵊⴷⵉⵔ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ.

ⵉⴼⵔⴰ ⵢⵏⵏⴰ ⵎⴰⵙⵙ ⴱⵓⴽⵓⵙ, ⴳ ⵢⴰⵏ ⵓⵎⵙⵏⴰⵍⴰ ⴷ ⵜⵡⵡⵓⵔⵜ ⵜⴰⵎⴰⵣⵉⵖⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵜ ⵏ ⵉⵏⵖⵎⵉⵙⵏ (ⵍⴰⵎⴰⴱ), ⵎⴰⵙ ⵜⴽⵛⵎ ⵜⵎⴰⵣⵉⵖⵜ ⴳ ⵉⴳⵔ ⵏ ⵓⵙⵍⵎⴷ, ⵎⵇⵇⴰⵕ ⵍⵍⵉⵖ ⵙⵓⵍ ⵍⵍⴰⵏⵜ ⵜⵎⵓⴽⵔⵉⵙⵉⵏ ⴳ ⵉⴳⵔ ⴰⵏⵏ, ⴷ ⵖⵓⵔⵙ ⴰⵏⵙⴰ ⵉⴼⵓⵍⴽⵉⵏ ⴳ ⵜⵙⵔⵜⴰⵏⵉⵏ ⵜⵉⴳⴷⵓⴷⴰⵏⵉⵏ, ⴷ ⵜⴽⵛⵎ ⵜⵏⵖⵎⴰⵙⵜ ⵙⵍⴰⵡⴰⵏ ⴰⴽⴽⵯ "ⴰⵙⵙⴰⵔⵓ ⵡⵉⵙⵙ ⵜⴰⵎ" ⴷ ⵜⴰⵡⵡⵓⵔⵜ ⵜⴰⵎⴰⵣⵉⵖⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵜ ⵏ ⵉⵏⵖⵎⵉⵙⵏ, ⵉⵙⵓⵍ ⵉⵏⵏⴰ, ⴳ ⵓⵙⴰⵜⵉ ⴷⵖ, ⵎⴰⵙ ⴰⵔⵣⵣⵓ ⴰⴽⴰⴷⵉⵎⵉ ⵉⵙⵙⵏ ⵓⵍⴰⵢ ⵉⵜⵜⴰⵇⵍⴰⵢⵏ ⴳ ⵎⵏⵏⴰⵡ ⵏ ⵉⴳⵔⵏ ⵏ ⵜⵓⵙⵙⵏⴰ ⵣⵓⵏⴷ ⵓⵎⵣⵔⵓⵢ ⴷ ⵜⵙⵏⵉⵙⵍⵜ ⴷ ⵜⴰⵙⵏⴰⵎⵓⵏⵜ ⴷ ⵜⴰⵙⵏⴼⴳⴰⵏⵜ.

ⵉⵙⵓⵍ ⵉⵏⵏⴰ ⵎⴰⵙ ⵜⴽⵛⵎ ⵜⵎⴰⵣⵉⵖⵜ ⴳ ⵢⴰⵏ ⵉⴳⵔ ⴰⵎⴰⵢⵏⵓ, ⵎⴰ ⵢⴰⴷ ⵉⴳⴰⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ ⴳ ⵉⴳⵔ ⵏ ⵜⵏⵖⵎⴰⵙⵜ ⴷ ⵓⵎⵢⴰⵡⴰⴹ, ⴷ ⵉⵙ ⵉⵙⵙⵏ ⵉⴳⵔ ⵏ ⵜⵙⵓⵖⵍⵜ ⵢⴰⵜ ⵜⴰⵏⴽⵔⴰ ⵉⴼⵓⵍⴽⵉⵏ, ⵉⵔⵏⴰ ⵢⵏⵏⴰ ⵎⴰⵙ ⵉⵥⵕⴳ ⵓⵙⵉⵏⴰⴳ, ⴳ ⵓⵙⴰⵜⵉ ⴷⵖ, 500 ⵓⴷⵍⵉⵙ ⴰⵎⴰⵢⵏⵓ, ⵎⴰ ⵢⴰⴷ ⵉⵎⵍⴰⵏ ⵜⵓⴳⴳⴰⵣ ⵏ ⵓⵡⴰⵏⴽ ⴷ ⵉⵔⵣⵣⵓⵏ ⴳ ⵓⴳⵏⵙⵓ ⵏ ⵜⵙⴷⴰⵡⵉⵏ ⵓⵍⴰ ⴳ ⵓⵙⴰⵜⵉ ⵏ ⵜⵓⵚⴽⴰⵡⵉⵏ ⵏ ⵡⴰⵎⵓⵏ ⵓⵖⵔⵉⵎ, ⵉⵏⵏⴰ ⴳ ⵓⵙⴰⵜⵉ ⴷⵖ ⵎⴰⵙ "ⴰⴷⴷⴰⴷ ⵏ ⵜⵎⴰⵣⵉⵖⵜ ⴷⴼⴼⵉⵔ ⵏ ⵉⵏⴰⵡ ⵏ ⴰⵊⴷⵉⵔ ⵉⵙⵙⵏ ⵓⵍⴰⵢ ⵓⵣⴷⵉⴳ ⴳ ⵓⵙⵡⵉⵔ ⵏ ⵜⵎⵙⴽⵜⴰ ⵓⵍⴰ ⵏ ⵓⵏⴰⵡ".

ⴳ ⵓⵙⴰⵜⵉ ⵏ ⵓⵙⴳⵓⵎ ⵏ ⵜⵙⵔⴰⴳⵜ, ⵎⴰ ⵢⴰⴷ ⵉⴰⴳⵏ ⴰⴼⵉⵔⵓⵙ "ⴽⵓⵕⵓⵏⴰ" ⴰⵎⴰⵢⵏⵓ (ⴽⵓⴼⵉⴷ-19), ⵉⵏⵏⴰ ⵎⴰⵙⵙ ⴱⵓⴽⵓⵙ ⵎⴰⵙ ⴰⴱⴰⵢⵢⵓⵕ ⴰⴷ ⵢⵉⵡⵉⴷ ⵜⵍⴽⴰⵎⵉⵏ ⵉⵛⵇⵇⴰⵏ ⴳ ⴰⴽⴽⵯ ⵜⵎⵔⵙⴰⵍⵉⵏ, ⵉⵙⵓⵍ ⵉⵏⵏⴰ ⵎⴰⵙ ⵜⴰⵡⵓⵔⵉ ⵏ ⵓⵙⵉⵏⴰⴳ ⵜⴳⴰ ⵜⴰⴳⵏⵙⵓⵜ ⵙⴳ ⴰⵙⵙ ⵏ 20 ⵎⴰⵕⵚ ⴰⵔ ⴰⵇⵇⵏ ⵏ ⵉⴱⵔⵉⵔ 2020, ⴰⵛⴽⵓ ⵉⵇⵇⵏ ⵓⵙⵉⵏⴰⴳ ⴰⴽⴽⵯ ⵉⵎⵓⵙⵙⵓⵏ ⵏⵏⵙ ⵉⴱⵕⵕⴰⵏⵉⵏ ⴷ ⵜⵓⵡⵡⵏⵉⵏ ⵏⵏⵙ ⴷ ⵜⵎⵙⵎⵓⵏⵉⵏ ⴷ ⵉⵎⵙⴽⴰⵔⵏ.

ⵉⵙⵓⵍ ⵉⵏⵏⴰ ⵎⴰⵙ ⵉⴳⵔⴰⵡⵏ ⴰⵎⵙⵜⴳⴳⴰⵔ ⴷ ⵓⵎⴰⵙⵙⴰⵏ ⵏ ⵓⵙⵉⵏⴳ ⵎⴰⵏⵏ ⴷⴼⴼⵉⵔ ⵏ ⵖⵉⴽ ⴰⵏⵏ ⴷ ⵙⵙⴼⴼⵖⵏ ⵢⴰⵜ ⵜⵙⵜⵔⴰⵜⵉⵊⵉⵜ ⵉⵏⵏⴰ ⵎⴰⵙ ⵉⵎⵙⵜⴳⴳⴰⵔⵏ ⵏ ⵜⵎⵔⵙⴰⵍⵜ ⴰⵎⵎⴰⵙ ⵏ ⵜⴱⴷⴰⴷⵜ ⴷ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⴷ ⵉⴳⵎⴰⵎⵏ ⵏ ⵉⴳⵔⴰⵡⵏ ⵉⵎⵙⵜⴳⴳⴰⵔⵏ ⴷ ⵉⵎⴰⵙⵙⵏ ⵔⴰⴷ ⵙⴽⵔⵏ ⵜⵡⵓⵔⵉⵡⵉⵏ ⵏⵏⵙⵏ ⵙ ⵜⵉⵍⵉⵜ ⴳ ⵓⵙⴰⵜⵉ ⵏ ⵉⵎⴰⴽⵏ ⵏ ⵓⵔⴰⵢ ⵉⵅⵚⵚⴰⵏ ⵙ ⵜⴰⵜⵉⵇⵏⵉⵜ ⵏ "ⵡⴰⵜⵙⴰⴱ", ⴷ ⵜⵙⵏⵙⵉⵏ ⵢⴰⴹⵏⵉⵏ ⵍⵍⵉ ⵜ ⵉⵔⵡⴰⵙⵏ, ⴷ ⵉⵣⵎⵎⴻⵎ ⵎⴰⵙⵙ ⴱⵓⴽⵓⵙ ⴳ ⵓⵣⵎⵎⵣⵓ ⴷⵖ ⵎⴰⵙ ⵓⵙⵡⵉⵔ ⵏ ⵜⵔⴰⵔⵓⵜ ⵓⵔ ⵉⴳⴰ ⴰⵎⵎ ⵡⵙⵙⴰⵏ ⵉⵣⵔⵉⵏ, ⵎⴰⵛ ⵉⵙⴽⵔ ⵓⵙⵉⵏⴰⴳ ⵜⵡⵓⵔⵉⵡⵉⵏ ⵉⴷⵍⵙⴰⵏ ⵏⵏⵙ, ⵎⴰ ⵢⴰⴷ ⵉⴳⴰⵏ ⴰⵙⵙⵓⵊⴷ ⵏ ⵜⵏⴰⴹⵜ ⵉⵥⵍⵉⵏ ⵙ ⵓⵎⵓⵙⵙⵓ ⵏⵏⵙ ⴳ ⵓⵙⴳⴳⵯⴰⵙ ⵏ 2019, ⴷ ⵓⵖⴰⵡⴰⵙ ⵏ ⵜⵡⵓⵔⵉ ⴳ ⵓⵙⴳⴳⵯⴰⵙ ⵏ 2020, ⴷ ⵓⵙⵏⵜⵉ ⵏ ⵜⵎⵙⴰⵙⵜⵍⵜ ⵏ ⵓⵙⴳⴳⵯⴰⵙ ⵏ 2021.

ⴳ ⵜⵙⴳⴰ ⵢⴰⴹⵏⵉⵏ, ⵉⵏⵏⴰ ⵎⴰⵙⵙ ⴱⵓⴽⵓⵙ ⵎⴰⵙ ⵉⴼⴼⵖ ⵓⴷⵍⵉⵙ ⴰⴼⵓⵍⴽⵉ ⵉⵙⴰⵡⵍⵏ ⵅⴼ ⵓⵙⵉⵏⴰⴳ ⵏ ⵓⵎⵣⵔⵓⵢ ⵏ ⵜⵎⵔⵙⴰⵍⵜ ⴰⴷ, ⴷ ⵉⵎⵍⴰⵏ ⵉⵏⴳⵔⴰⵡⵏ ⵏⵏⵙ ⴷ ⵉⵙⴰⴳⵎⵏ ⵏ ⵜⵡⵓⵔⵉⵡⵉⵏ ⵜⵉⵙⵜⵔⴰⵜⵉⵊⵉⵏ ⵏⵏⵙ, ⴷ ⵓⵙⵓⵜⴳ ⵏ ⵜⵡⵓⵔⵉⵡⵉⵏ ⵏⵏⵙ, ⵉⵙⴷⴷⵉⴷ ⵎⴰⵙ ⵓⴷⵍⵉⵙ ⴰⴷ ⵉⴳⴰ ⵜⴰⵙⴰⵖⵓⵍⵜ ⵏ ⴰⴽⴽⵯ ⵎⴷⴷⵏ ⵍⵍⵉ ⵔⴰⵏⵉⵏ ⴰⴷ ⵙⵙⵏ ⵜⵖⴰⵡⵙⵉⵡⵉⵏ ⵍⵍⵉ ⵢⵙⴽⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.

ⴳ ⵓⵙⴰⵜⵉ ⵏ ⵉⵙⵜⴰⵢⵏ ⵏ ⵉⵎⴰⵍ, ⵉⵏⵏⴰ ⵎⴰⵙⵙ ⴱⵓⴽⵓⵙ ⵎⴰⵙ ⵓⵙⵉⵏⴰⴳ ⵉⵙⵔⵙ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⴳⴳⵯⴰⵙ 2021 ⵍⵍⵉⵖ ⵍⵍⴰⵏ ⵎⵏⵏⴰⵡ ⵏ ⵉⵙⴰⴳⵎⵏ, ⴰⵎⵎⴰⵙ ⵏⵏⵙⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ, ⴰⵛⴽⵓ ⵉⵎⵍⴰ ⵡⴱⴰⵢⵢⵓⵕ ⵏ "ⴽⵓⵕⵓⵏⴰ" ⵎⴰⵙ ⵉⴱⵔⵉⴷⵏ ⵉⵇⴱⵓⵕⵏ ⴳ ⵓⵎⵢⴰⵡⴰⴹ ⴷ ⵓⵔⵣⵣⵓ ⴷ ⵓⵙⵢⴰⴼⵓ ⵓⵔ ⵙⵓⵍ ⵄⴷⵉⵍⵏ, ⵉⵔⵏⴰ ⵢⵏⵏⴰ ⴳ ⵓⵙⴰⵜⵉ ⴷⵖ ⵎⴰⵙ ⵉⵖ ⵜⵔⴰ ⵜⵎⴰⵣⵉⵖⵜ ⴰⵔ ⵜⴱⵉⴷⴷ ⴷ ⴰⴷ ⵜⵣⵣⵉⴳⵣ, ⵉⵅⵚⵚⴰ ⵢⴰⵜ ⴰⴷ ⵜⴽⵛⵎ ⴳ ⵉⴳⵔ ⴰⴷ. 

ⵉⵙⵓⵍ ⵉⵏⵏⴰ ⵎⴰⵙ ⴰⵔ ⵢⴰⴷ ⵍⵍⵉ ⵢⵜⵜⵡⵓⵔⵉ ⵓⵙⵉⵏⴰⴳ ⵓⵙⴰⵜⵉ ⵏ ⵓⵙⵎⴽⵍ ⵏ ⵜⵓⵜⵍⴰⵢⵜ ⵙ ⵉⵅⴼ ⵏⵏⵙ, ⴷ ⵎⴰⵙ ⵜⵍⵍⴰ ⵜⵎⴰⵣⵉⵖⵜ ⴳ ⵓⵏⴳⵔⴰⵡ "ⵡⵉⵏⴷⵓⵡⵣ" 2008 ⴷ 2010, ⴷ ⵎⴰⵙ ⵓⵔ ⵖⵓⵔⵙ ⵉⵍⵍⴰ ⵓⵏⴳⵔⴰⵡ ⵏ ⵓⵎⵏⵉⴷⵉ ⴷ ⵓⵙⵏⵎⴰⵔⴰ ⴷ ⵓⵎⴰⵡⴰⵍ ⴷ ⵜⵙⵏⴰⵢⵜ, ⵉⴼⵔⴰ ⵢⵏⵏⴰ ⵎⴰⵙ ⵉⵥⴹⴰⵕ ⵓⵙⵉⵏⴰⴳ, ⴰⵔ ⴷⵖⵉ, ⴰⴷ ⵉⵙⵙⵓⴼⵖ ⵎⵏⵏⴰⵡ ⵏ ⵜⵓⵚⴽⴰⵡⵉⵏ ⵅⴼ ⵜⴳⵓⵔⵉ, ⵎⴰⵛ ⵜⴳⵓⵔⵉ ⵢⴰⴷ ⵓⵔ ⵍⵍⵉⵏⵜ ⴳ ⵓⴳⵏⵙ ⵏ ⵜⵡⵉⵏⵙⵉⵏ ⵏⵖⴷ ⵜⴳⵓⵔⵉ. 

ⴷ ⵉⵇⵇⵏ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙ ⵉⵔⴰ ⵓⵙⵉⵏⴰⴳ ⴰⴷ ⵉⵙⴽⵔ ⵜⵎⴷⵔⴰⵡⵉⵏ ⵄⵥⴹⴰⵕⵏ ⴰⴷ ⴰⵡⵉⵏⵜ ⴰⵜⵉⴳ ⵉⴼⵓⵍⴽⵉⵏ ⵉ ⵜⵏⴽⵔⴰ ⵙ ⵉⵙⵏⵜⵉⵏ ⵏⵏⵙ.

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B5%9C%E2%B4%B0%E2%B5%8E%E2%B4%B0%E2%B5%96%E2%B5%93%E2%B5%8F%E2%B5%9C-%E2%B5%8F-%E2%B5%93%E2%B5%99%E2%B5%89%E2%B5%8F%E2%B4%B0%E2%B4%B3-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B5%8F-%E2%B5%9C%E2%B5%93%E2%B5%99%E2%B5%99%E2%B5%8F%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C-%E2%B5%9C%E2%B4%B7%E2%B4%B7%E2%B5%93%E2%B5%94-%E2%B4%B0%E2%B5%8E%E2%B5%8E-%E2%B4%B0%E2%B4%B7%E2%B4%B7%E2%B4%B0%E2%B4%B7-%E2%B5%8D%E2%B5%8D%E2%B5%89%E2%B5%96-%E2%B5%A2%E2%B4%B0%E2%B4%B7-%E2%B5%8D%E2%B5%8D%E2%B5%89-%E2%B5%9C%E2%B5%8D%E2%B5%8D%E2%B4%B0-%E2%B4%B7%E2%B4%B0%E2%B5%9C-%E2%B5%8F