"ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵢⵏⴰⵙ 09 ⵏⵓⵡⴰⵏⴱⵉⵔ 2020 ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⵕⵕⴱⴰⵟ, ⵢⴰⵜ ⵜⵉⵔⵎⵜ ⵏ ⵜⵡⵓⵔⵉ ⵉⵙⴰⵡⵍⵏ ⵅⴼ ⵜⵙⵜⵔⴰⵜⵉⵊⵉⵜ ⵏ ⵜⴳⵣⵣⴰⵢⵜ ⵅⴼ "ⴽⵓⴼⵉⴷ-19"."
ⴰⵎⵎⴰⵙ ⵏ ⵜⵉⵔⵎⵜ ⴰⴷ, ⴷ ⵅⴼ ⵜⵙⵉⵍⴰ ⵏ ⵜⵏⵏⴰⵢⵜ ⵍⵍⵉ ⵜⴼⴽⴰ ⵓⴳⵔⴰⵡ ⴰⵏⴰⵎⵓⵔ ⴰⵎⴰⵙⵙⴰⵏ ⵉⵏⵏⴰⵏ ⵎⴰⵙ ⵓⵎⵣⵉⵣⵣⵍ ⵏ ⵜⴳⵣⵣⴰⵢⵜ ⵜⴳⴰ ⵢⴰⵜ ⵜⵎⵔⴰⵔⵓⵜ ⵉⵄⴷⵍⵏ ⵉⵥⴹⴰⵕⵏ ⴰⴷ ⵉⵙⴱⵉⴷⴷ ⵓⴱⴰⵢⵢⵓⵔ ⴰⴷ. ⴼ ⵖⵉⴽⴰⵏⵏ, ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵏⴹⵏ ⵢⴰⵜⵜⵓⵢⵏ ⵏⵏⵙ ⴰⴼ ⴰⴷ ⵜⵏⵓⵕⵥⵎ, ⴳ ⵉⵎⴰⵍⴰⵙⵙⵏ ⴰⴷ ⵢⵓⵛⴽⴰⵏ, ⵢⴰⵜ ⵜⵎⵀⵍⴰ ⵜⴰⵎⵇⵕⴰⵏⵜ ⵏ ⵜⴳⵣⵣⴰⵢⵜ ⵅⴼ "ⴽⵓⴼⵉⴷ-19".
ⵜⴰⵎⵀⵍⴰ ⵜⴰⵏⴰⵎⵓⵔⵜ ⴰⴷ, ⵓⵔ ⵊⵊⵓ ⵢⵜⵜⵓⵥⵕⴰⵏ ⵣⵓⵏⴷ ⵏⵜⵜⴰⵜ, ⵜⵔⴰ ⴰⴷ ⵜⵃⴱⵓ ⴰⴽⴽⵯ ⵉⵎⵣⴷⴰⵖⵏ ⵙ ⵢⴰⵜ ⵜⴳⵣⵣⴰⵢⵜ ⵉⵥⴹⴰⵕⵏ ⴰⴷ ⵜⴳ ⴰⵎⵎⴰⵙ ⵉⴼⵓⵍⴽⵉⵏ ⵏ ⵓⴼⵔⴰⴳ ⴷⴰⵜ ⵓⴼⵉⵔⵓⵙ ⴷ ⵓⵎⵙⴰⵙⴰ ⵏ ⵓⵣⵣⵉⴳⵣ ⵏⵏⵙ. ⵖⵉⴽ ⵍⵍⵉ ⵏⵏⴰⵏⵜ ⵜⵖⵓⵔⵉⵡⵉⵏ ⵜⵉⵙⴷⵓⵙⵉⵏ ⵉⵜⵎⵎⴰⵏ ⵢⴰⴷ, ⵏⵖⴷ ⵅⵜⵉⵏⵏ ⵍⵍⵉ ⵙⵓⵍ ⵉⵜⵜⵓⵙⴽⴰⵔⵏ, ⵜⴰⵏⴼⵔⵓⵜ ⴷ ⵜⵕⵡⵉ ⵏ ⵜⴳⵣⵣⴰⵢⵜ ⴰⴷ ⵜⵜⵓⵎⵍⴰⵏⵜ.
ⴼ ⵖⵉⴽⴰⵏⵏ, ⵔⴰⴷ ⵜⵃⴱⵓ ⵜⵎⵀⵍⴰ ⵢⴰⴷ ⵉⵏⵎⵓⵔⵉⵏ ⵍⵍⵉ ⴷⴰⵔⵜⵏ ⵉⵍⵍⴰⵏ 18 ⵓⵙⴳⴳⵯⴰⵙ, ⵙ ⵢⴰⵜ ⵜⴳⵣⵣⴰⵢⵜ ⵉⵜⵜⵓⵙⴽⴰⵔⵏ ⵙⵏⴰⵜ ⵜⴽⵍⴰⵢ. ⵔⴰⴷ ⵜⴱⴷⵓ ⵜⵎⵀⵍⴰ ⵙ ⵉⵎⵙⵖⴰⵏⵏ ⵏ ⵜⴷⵓⵙⵉ, ⴷ ⵜⵏⴱⴰⴹⵉⵏ ⵜⴳⴷⵓⴷⴰⵏⵉⵏ, ⴷ ⵜⵏⴱⴰⴹⵉⵏ ⵏ ⵜⵏⴼⵔⵓⵜ, ⴷ ⵉⵎⵙⵖⴰⵏⵏ ⵏ ⵓⵙⴳⵎⵉ ⴰⵏⴰⵎⵓⵔ, ⴷ ⵎⴷⴷⵏ ⵢⵓⵙⵙⵔⵏ ⵏⵖⴷ ⵓⵔ ⵉⵥⴹⴰⵕⵏ ⵉ ⵡⴼⵉⵔⵓⵙ. ⴷⴼⴼⵉⵔ ⵖⵉⴽ ⴰⵏⵏ, ⵔⴰⴷ ⵜⵍⴽⵎ ⵜⴳⵣⵣⴰⵢⵜ ⵎⴰⴷ ⵉⵇⵇⴰⵎⴰⵏ ⴳ ⵉⵎⵣⴷⴰⵖⵏ.
ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵏⴹⵏ ⵢⴰⵜⵜⵓⵢⵏ ⵏⵏⵙ ⵉ ⵜⵏⴱⴰⴹⵉⵏ ⵉⵎⵙⵜⴳⴳⴰⵔⵏ ⴰⴼ ⴰⴷ ⴱⴷⴷⵏ ⵅⴼ ⵓⵙⵙⵉⵊⴷ ⴷ ⵓⵣⵔⵔⵓⵢ ⵄⴷⵍⵏⵉⵏ ⵏ ⵜⵎⵀⵍⴰ ⵜⴰⵏⴰⵎⵓⵔⵜ ⵜⴰⵎⵇⵕⴰⵏⵜ ⴰⴷ, ⵙⵡⴰ ⴳ ⵓⵙⵡⵉⵔ ⴰⴷⵓⵙⴰⵏ, ⵏⵖⴷ ⴰⵍⵓⵊⵉⵙⵜⵉ, ⵏⵖⴷ ⴰⵜⵉⵇⵏⵉ. ⵉⴳⴰ ⵍⵃⴰⵍ, ⵙⵍⴰⵡⴰⵏ ⴰⴽⴽⵯ, ⴰⴷⴰⴼ ⵙ ⵜⴳⵣⵣⴰⵢⵜ, ⴳ ⵢⴰⵏ ⵓⵙⴰⵜⵉ ⴰⵏⴰⵎⵓⵏ ⴷ ⴰⵏⴱⴷⴰⴷ, ⴷ ⵜⵉⵍⵉⵜ ⵏⵏⵙ ⵙ ⵜⵙⵎⴽⵜⵉⵡⵉⵏ ⵉⴳⵓⵎⵏ, ⵓⵍⴰ ⵜⴰⵍⵓⵊⵉⵙⵜⵉⵜ ⵜⴰⵙⴰⴼⴰⵔⵜ ⵏ ⵓⵙⵙⴰⵢ ⴷ ⵏ ⵜⵉⴽⴽⵉ ⵏ ⵜⴳⵣⵣⴰⵢⵜ ⴳ ⴰⴽⴽⵯ ⵡⴰⴽⴰⵍ ⴰⵏⴰⵎⵓⵔ, ⴷ ⵓⵙⵔⴰⵙ ⵏ ⵢⴰⵏ ⵓⵏⴳⵔⴰⵡ ⵉⵕⵡⴰⵏ ⵏ ⵓⵙⵓⵔⵙ ⵉⵣⵡⴰⵔⵏ ⵏ ⵉⵎⵔⵓⵔⵉⵏ.
ⴼ ⵖⵉⴽ ⴰⵏⵏ, ⵉⵖⵕⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜⵜⵓⵙⵎⴰⵏⵏ ⴰⴽⴽⵯ ⵜⵏⴰⴼⵓⵜⵉⵏ ⴷ ⵜⵎⴰⵡⴰⵙⵉⵏ ⵉⵎⵙⵜⴳⴳⴰⵔⵏ, ⵙⵍⴰⵡⴰⵏ ⴰⴽⴽⵯ ⵉⵎⵙⵖⴰⵏⵏ ⵏ ⵜⴷⵓⵙⵉ, ⴷ ⵏ ⵜⵎⵙⵙⵓⴳⵓⵔⵜ ⵜⴰⵏⴰⵎⵓⵔⵜ, ⴷ ⵜⵏⴱⴰⴹⵉⵏ ⵏ ⵓⵏⵎⴰⵍⴰ, ⵓⵍⴰ ⴰⵏⵏⴰⵍ ⵉⵅⵚⵚⴰⵏ ⵏ ⵜⴳⴰⵍⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵖⵉⴽ ⵍⵍⵉ ⵔⴰⵏⵜ ⵉⵙⵖⵍⴰⴼⵏ ⵍⵍⵉ ⵢⴰⵜⵏ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⵏⵙⵙⵉⵅⴼ ⴰⵏⴰⴼⵍⵍⴰ ⴷ ⵓⵏⵙⵙⵉⵅⴼ ⵏ ⵍⵉⵟⴰ ⵎⴰⵊⵓⵕ ⴰⵎⴰⵜⴰⵢ ⵏ ⵜⴳⴰⵍⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴳ ⵓⵙⴰⵜⵉ ⵏ ⵓⵙⴱⵉⴷⴷ ⵏ "ⴽⵓⴼⵉⴷ-19".
ⵜⵣⵔⵉ ⵜⵉⵔⵎⵜ ⵏ ⵜⵡⵓⵔⵉ ⵢⴰⴷ ⴳ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⴷ ⵓⵎⵛⵛⵉⵡⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵎⴰⵙⵙ ⴼⵓⴻⴰⴷ ⵄⴰⵍⵉ ⵍⵀⵉⵎⵎⴰ, ⴷ ⵓⵎⴰⵡⵙⴰⵙ ⵏ ⵓⴳⵏⵙⵓ, ⵎⴰⵙⵙ ⵄⴱⴷⵍⵡⴰⴼⵉ ⵍⴼⵜⵉⵜ, ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵏ ⵉⵣⴷⵖⵏ ⴳ ⴱⵕⵕⴰ, ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴷ ⵓⵎⴰⵡⵙⴰⵙ ⵏ ⵜⴷⵓⵙⵉ, ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴷ ⵓⵊⵉⵏⵉⵕⴰⵍ ⴷⵓ ⴽⵓⵕ ⴷⴰⵕⵎⵉ, ⵄⴱⴷⵍⴼⵜⵜⴰⵃ ⵍⵡⵕⵕⴰⵇ, ⴰⵎⴳⴳⵉⵡⵙ ⴰⵎⴰⵜⴰⵢ ⵏ ⵜⴳⴰⵍⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴷ ⵓⵊⵉⵏⵉⵕⴰⵍ ⴽⵓ ⴽⵓⵕ ⴷⴰⵕⵎⵉ, ⵎⵓⵃⵎⵎⴷ ⵀⴰⵔⴰⵎⵓ, ⴰⵏⵙⵙⵉⵅⴼ ⵏ ⵜⵊⴰⴹⴰⵕⵎⵉⵜ ⵜⴰⴳⵍⴷⴰⵏⵜ, ⴷ ⵓⵊⵉⵏⵉⵕⴰⵍ ⴷⵓ ⴱⵔⵉⴳⴰⴷ ⵎⵓⵃⵎⵎⴷ ⵄⴱⴱⴰⵕ, ⴰⵎⴳⴳⵉⵡⵙ ⵏ ⵜⵏⴰⴼⵓⵜ ⵏ ⵜⴷⵓⵙⵉ ⵜⴰⵄⵚⴽⵕⵉⵜ ⵏ ⵜⴳⴰⵍⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⵎⴰⵜⴰⵔ ⵏ ⵡⴰⴽⴰⵍ ⴰⵏⴰⵎⵓⵔ, ⵎⴰⵙⵙ ⵄⴱⴷⵍⵍⵟⵉⴼ ⵃⵎⵎⵓⵛⵛⵉ".