Published on MAPNews (https://www.mapnews.ma/am)

Accueil > ⵜⵉⵎⴰⵢⵏⵓⵜⵉⵏ ⵏ ⵓⴱⴰⵔⴰⵣ ⴰⵏⴰⵎⵓⵔ: ⵜⵎⵍⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⵜⴰⵏⵏⴰⵢⵜ ⵏⵏⵙ

ⵜⵉⵎⴰⵢⵏⵓⵜⵉⵏ ⵏ ⵓⴱⴰⵔⴰⵣ ⴰⵏⴰⵎⵓⵔ: ⵜⵎⵍⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⵜⴰⵏⵏⴰⵢⵜ ⵏⵏⵙ

17 ⵢⵓⵏⵢⵓ 2021 Version Imprimable
ⵕⵕⴱⴰⵟ - ⵜⵏⵏⴰ "ⵜⴰⴹⴰ ⵜⴰⵎⵖⵔⴰⴱⵉⵜ ⵉ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ" ⵎⴰⵙ ⵜⴹⴼⵕ, ⵙⴳ ⵓⵙⴱⴷⴷⵉ ⵏⵏⵙ ⴰⵙⵙ ⵏ 8 ⵎⴰⵢⵢⵓ 2021, ⵜⵉⵎⴰⵢⵏⵓⵜⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵓⵙⵔⵉⴷ ⴰⴽⴷ ⵉⴳⵔ ⵏ ⵓⵙⵡⵓⵔⵉ ⵏⵏⵙ.

ⴰⵎⵎⴰⵙ ⵏ ⵢⴰⵏ ⵓⵙⵉⵡⴹ ⵉⵍⴽⵎⵏ ⵉ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵜⵏⵖⵎⴰⵙⵜ (ⵍⴰⵎⴰⴱ), ⵜⵏⵏⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⵎⴰⵙ ⵜⵙⵓⵜⴳ ⴰⵎⵙⴳⴷⴰⵍ ⴷⴰ ⵉⴹⴼⵕⵏ ⵜⴰⵍⴰⵍⵉⵜ ⵏ "ⵜⴰⴹⴰ ⵜⴰⵎⵖⵔⴰⴱⵉⵜ" ⴷ ⵜⵎⵍⴰ ⵡⵙⵏⵉⵎⵎⵔ ⵏⵏⵙ ⵉ ⴰⴽⴽⵯ ⵡⵉⴷ ⵉⵡⵙⵏⵉⵏ ⴳ ⵎⴰⵢⴰⵏ ⴳ ⵓⵙⵡⵉⵔ ⴰⵡⵏⴳⵉⵎ ⴷ ⵓⵏⵎⴰⵍⴰⵢ. 

"ⴰⵔ ⵜⴻⵜⵜⵍⴰⵖⵉ ⵉ ⵎⴰⵕⵕⴰ ⵉⵡⴷⴰⵏ ⵎⴰⵙⴷ ⴰⵙⵏⴼⴰⵕ ⵏⵏⵙ ⵢⵓⵜⵉ ⵜⵉⴳⵯⵎⴰⵏⵉⵢⵉⵏ ⵏⵏⵓⴽⵎⴰⵏⵉⵏ, ⴷ ⵉⵎⵣⴰⵔⴰⵢⵏ ⵉⴷⵢⵓⵍⵓⵊⵉⵜⵏ, ⴷ ⵉⵎⵏⵣⴰⵖⵏ ⵉⵙⵔⵜⴰⵏⵏ, ⵉⴷⴷⵖ ⴷⵉⴳⵙ ⴰⵢⵍⵍⵉ ⵜⴻⵜⵜⵍⴰⵖⵉ ⴽⵓ ⵢⴰⵜ ⴷ ⴽⵓ ⵢⴰⵏ ⵃⵎⴰ ⴰⴷ ⵎⵓⵏⵏ ⵅⴼ ⵜⴳⵯⵎⴰⵏⵉⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⴷ ⵓⵙⵎⵖⵔ ⵙ ⵜⵎⴰⴳⵉⵜ ⵏⵏⵙ, ⴰⵎⵎⴰⵙ ⵏⵏⵙ ⵜⴰⵎⴰⵣⵉⵖⵜ ⵜⴰⵎⴰ ⵏ ⵉⴼⵔⴷⵉⵙⵏ ⴷ ⵉⵎⵓⵖⵍⴰ ⵢⴰⴹⵏ, ⵎⵉⵏⵣⵉ ⵜⴳⴰ ⵢⴰⵜ ⵜⵎⴰⴳⵉⵜ ⵉⵙⵎⵖⵔⵏ ⵉⵙⵅ ⵏⵏⵙ, ⵜⴰⵎⵏⴰⵡⴰⵢⵜ ⵉⵏⵏⵓⵕⵥⵎⵏ ⵅⴼ ⵓⵙⵓⵜⵍ ⵏⵏⵙ ⴰⴷⵍⵙⴰⵏ ⴷ ⵓⵖⵔⵎⴰⵏ ⴰⵡⴷ ⵅⴼ ⵜⵉⴼⴼⵓⴳⵏⴰ ⴰⴽⴽⵯ", ⵎⴰ ⵢⴰⴷ ⵙⵓⵍ ⵉⵏⵏⴰ ⵡⵙⵉⵡⴹ.

ⵜⵔⵏⴰ ⵜⵎⵍⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⴰⵙⵎⵖⵔ ⵏⵏⵙ ⵉ "ⴰⵢⵍⵍⵉ ⵜⴳⴳ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⴰⵔ ⵜⴻⵜⵜⴰⵏⵏⴰⵢ ⵎⴰⵙⴷ ⴰⵎⵓⵏ ⵅⴼ ⵜⵎⵖⵔⴰⴱⵉⵜ ⴷⴰ ⵉⵙⴷⵓⵙ ⵉⵏⵉⵔ ⴰⴳⵯⵏⵙⴰⵏ, ⵉⴳ ⵢⴰⵜ ⴳ ⵜⴱⵔⵉⴷⵉⵏ ⵏ ⵓⵎⵏⴰⵍⴰ ⵏ ⵉⵏⴰⵥⴰⵕⵏ ⵉⵙⴳⴰⵡⴰⵏⵏ ⴷ ⵉⵎⴰⴹⵍⴰⵏⵏ ⴷ ⵓⵙⴷⵓⵙ ⵏ ⵡⴰⵏⵙⴰ ⵏ ⵍⵎⵖⵔⵉⴱ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ".

ⵜⵙⴷⴷⵉⴷ ⵙⵓⵍ "ⵜⴰⴹⴰ ⵜⴰⵎⵖⵔⴰⴱⵉⵜ" ⵎⴰⵙⴷ ⴰⵎⵓⵏ ⵅⴼ ⵜⵎⵖⵔⵉⴱⵉⵜ ⴷ ⴰⵙⵎⵖⵔ ⵙ ⵓⵎⵣⵔⵓⵢ ⵏ ⵍⵎⵖⵔⵉⴱ ⵙ ⵜⴼⵔⴽⵉⵡⵉⵏ ⵏⵏⵙ ⴷ ⵜⵙⴳⵉⵡⵉⵏ ⵏⵏⵙ, ⴷ ⵓⴳⵍⴰ ⵏ ⵜⴰⵢⵙⵉ ⵏⵏⵙ ⵜⴰⴽⵎⴰⵎⵜ ⴷ ⵜⴰⵔⴰⴽⵎⴰⵎⵜ, ⵙ ⵓⵢⴰ ⴷⴰ ⵜⴹⴼⴼⵕ ⵜⴰⴹⴰ ⵙ ⵜⴰⵡⵉⵜ ⵜⴰⵎⵇⵔⴰⵏⵜ ⴰⵎⵙⴳⴷⴰⵍ ⵉⵍⵍⴰⵏ ⵅⴼ ⵡⴰⵏⵙⴰ ⴰⵎⵣⵔⴰⵢ "ⵉⵍⵉⵖ" ⴳ ⵜⴳⵔⴰⵡⵜ ⵏ ⵙⵉⴷⵉ ⵃⵎⴰⴷ ⵓⵎⵓⵙⴰ, ⵉⵜⵜⵓⵙⴷⵉⴷⴷⵉⵏ ⴳ ⵓⵙⵏⴼⴰⵕ ⵏ ⵓⵎⴰⵎⴽ ⵏ ⵜⵎⵔⵏⵉⵡⵜ ⵏⵏⴰ ⵜⴳⴳ ⵜⵙⵏⵓⵔⴰⵢⵜ ⵜⴰⵖⵔⵎⴰⵏⵜ.

"ⴷⴰ ⵜⴻⵜⵜⵍⴰⵖⵉ “ⵜⴰⴹⴰ ⵜⴰⵎⵖⵔⴰⴱⵉⵜ” ⴰⵙⵇⵇⵉⵎ ⴰⴳⵔⴰⵡⴰⵏ ⵏ “ⵙⵉⴷⵉ ⵃⵎⴰⴷ ⵓⵎⵓⵙⴰ” ⴰⴷ ⵉⴳⴳ ⴰⵙⵎⵙⴰⵙⴰ ⵏ ⵓⵙⵏⴼⴰⵕ ⵉⵜⵜⵓⵙⵏⴽⴰⴷⵏ ⴰⴽⴷ ⴰⴼⵔⴰⴳ ⵏ ⵡⴰⵏⵙⴰⵜⵏ ⴰⴽⴽⵯ ⵏ ⵜⴰⵢⵙⵉ ⵉⵎⵣⵔⴰⵢⵏ ⵏ ⵉⵍⵉⵖ ⴷ ⵓⵙⵉⴷⴼ ⵏⵏⵙ ⴳ ⵓⵙⴰⵜⵉ ⵏ ⵉⵙⵏⴼⴰⵕⵏ ⵉⵏⴳⵎⵓⵜⵏ ⵏ ⵜⴳⵔⴰⵡⵜ, ⵎⴽⵍⵍⵉ ⵜⵙⵙⵉⵎⵖⵓⵔ ⵜⴰⴷⵓⵢⵜ ⵜⴰⵏⴰⵎⵓⵔⵜ ⵏⵏⴰ ⴳⴳⵏ ⵉⵎⴰⵣⵣⴰⵍⵏ ⵓⵖⵔⵉⵎⵏ ⴷ ⵉⵎⵔⵣⵓⵜⵏ ⴰⴽⴷ ⵜⵎⵓⴳⴳⵉⵜⵉⵏ ⵜⵉⵙⵔⵜⴰⵏⵉⵏ ⴰⴽⵓⴷ ⵍⵍⵉ ⴷ ⵉⴼⴼⵖ ⵓⵍⴰⵖⵉ ⵏ ⵓⵙⵇⵇⵉⵎ ⴰⴳⵔⴰⵡⴰⵏ ⴷ ⵢⵉⵡⵉⵏ ⵜⵉⵍⵍⵉⵜ ⵏ ⵓⵙⵏⴼⴰⵕ ⴰⴷ", ⵎⴰ ⵢⴰⴷ ⵙⵓⵍ ⵉⵏⵏⴰ ⵡⵙⵉⵡⴹ.

ⴳ ⵜⵙⴳⴰ ⴰⴷ ⵏⵉⵜ, ⵜⵏⵏⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⵎⴰⵙ ⴷⴰ ⵜⴻⵜⵜⵖⴰⵙ ⴳ ⵜⵖⵜⴰⵙⵜ ⵏ ⴽⵔⴰ ⵏ ⵉⵎⵙⵜⴳⴳⴰⵔⵏ ⴷ ⵢⵉⵡⵉⵏ ⴰⵙⵏⴼⵍ ⵏ ⵡⴰⵙⵙⴰⵖⵏ ⵏ ⵜⵉⵏⵎⴰⵍ ⵢⵓⵙⵉⵏⵉⵏ ⵜⴰⵎⴰⴳⵉⵜ ⵏ ⵢⵉⴳⵔ ⵏⵏⵙⵏⵜ ⴰⴷⵍⵙⴰⵏ ⴳ ⵜⵎⵏⴰⴹⵜ ⵏ ⴳⵯⵍⵎⵉⵎ ⵡⴰⴷ ⵏⵓⵏ, (ⵜⵉⵎⵎⵓⵍⴰⵢ, ⵉⴽⵉⵙⵍ ⴷ ⴰⵎⵃⵉⵔⵉⵛ), ⵎⴽⵍⵍⵉ ⵜⵜ ⵜⵙⵙⵓⵙⵎ ⵜⵉⴳⵉⵜ ⵏ ⵓⵎⴰⵡⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵍⵍⵉ ⵉⵙⴱⴷⴷⵏ ⴰⵣⵣⴳⵉⵔ ⵏ ⵜⵖⵜⴰⵙⵜ ⴰⴷ ⴹⴰⵕⵜ ⵏ ⵓⵏⵄⴰⵕ ⵏ ⵉⵎⴰⵣⵣⴰⵍⵏ ⵏ ⵡⴰⵎⵓⵏ ⵓⵖⵔⵉⵎ.

ⴷ ⴰⵔ ⵜⴻⵜⵜⵍⴰⵖⵉ ⵙ ⵜⵎⵍⴷⴰ ⴰⴷ ⵎⴰⵙⴷ ⴰⵙⵓⵜⴳ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ ⴷⴰ ⵉⵙⵙⵏⵜⴰⵢ ⵙ ⵓⵙⵎⵖⵔ ⵏ ⵜⵎⴰⴳⵉⵜ ⵜⴰⴷⵖⵔⴰⵏⵜ, ⵜⴰⵏⵎⵏⴰⴹⵜ, ⴷ ⵜⵏⴰⵎⵓⵔⵜ, ⵎⴰⴷ ⵢⴰⴷ ⵜⵏⵏⴰ "ⵜⴰⴹⴰ ⵜⴰⵎⵖⵔⴰⴱⵉⵜ", ⵜⵔⵏⴰ ⵜⵏⵏⴰ ⵎⴰⵙ ⵓⴼⵔⴰⴳ ⵏ ⵡⴰⵙⵙⴰⵖⵏ ⵏ ⵉⴷⵖⴰⵔⵏ ⵉⴷⵖⵔⴰⵏⵏ, ⴷ ⵓⵙⴻⵙⵙⴰⵖ ⵏ ⵡⵉⵢⵢⴰⴹ ⵉ ⵜⵎⵔⵙⵉⵍⵉⵏ ⵜⵉⵎⴰⵢⵏⵓⵜⵉⵏ ⴷ ⵜⴰⵙⵓⵔⵉⴼⵜ ⵜⴰⴷⵙⵍⴰⵏⵜ ⵉ ⵓⵙⴷⵓⵙ ⵏ ⵓⵙⵢⴰⴼⴰ ⵙ ⵜⴳⵯⵎⴰⵏⵉⵜ ⵜⴰⵏⴰⵎⵓⵔⵜ.

ⴷⴰ ⵜⴻⵜⵜⵔⴰⵔ "ⵜⴰⴹⴰ ⵜⴰⵎⵖⵔⴰⴱⵉⵜ" ⵜⴰⵖⴹⴼⵜ ⵏ ⵉⵎⵙⵜⴳⴳⴰⵔⵏ ⴳ ⵉⴳⵔⴰⵏ ⴰⴽⴽⵯ ⴰⴷ ⵡⵓⵍⵓⵏ ⵡⵉⴷ ⴳⴰⵏⵉⵏ ⵓⵙⵍⵉⴳⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵉⵔⵔⴰ ⵏ ⵜⵙⴽⴽⴰⵏⵉⵏ ⴷ ⵜⴼⵉⵍⵉⵏ ⵏ ⵜⵎⵔⵙⵉⵍⵉⵏ ⵍⵍⵉ ⵙⵡⵓⴷⴷⵓⵏ, ⴰⴼⴰⴷ ⴰⴷ ⴰⵏⴼⵏ ⵉ ⵜⵣⴳⴰⵍⵉⵏ ⵏ ⵜⵉⵙⵏⵎⴰⵔⵔⴰⵜⵉⵏ ⴷ ⵜⵉⵏⵊⵕⵓⵎⵉⵏ ⴷ ⵜⵉⵏ ⵏ ⵓⵎⴰⵡⴰⵍ ⴳ ⵓⵙⵓⵖⵍ ⵙ ⵜⵎⴰⵣⵉⵖⵜ.

ⵜⵎⵍⴰ ⵙⵓⵍ "ⵜⴰⴹⴰ ⵜⴰⵎⵖⵔⴰⴱⵉⵜ" ⴰⵙⵓⵜⴳ ⵏⵏⵙ ⵉ ⵓⵙⵎⵔⵙ ⵏ ⵉⵎⵙⵜⴳⴳⴰⵔⵏ ⵏ ⵜⵔⴰⴱⴱⵓⵜ ⵏ ⵍⵃⴰⵙⴰⵏⵉⵢⴰ ⵏ ⵓⴳⴰⴷⵉⵔ ⵉⵙⴽⴽⵉⵍⵏ ⵏ ⵜⵎⴰⵣⵉⵖⵜ ⵜⵉⴼⵉⵏⴰⵖ ⴳ ⵉⵔⵉⴽⵉⵜⵏ ⵏ ⵉⵎⵓⵔⴰⵔⵏ, ⴷ ⴰⵔ ⵜⴻⵜⵜⵍⴰⵖⵉ ⵜⵉⵔⵓⴱⴱⴰ ⵢⴰⴹⵏ ⵏ ⵜⴱⵔⵣⴰ ⵜⴰⵏⴰⵎⵓⵔⵜ ⴰⴷ ⴳⴳⵏⵜ ⴰⵎ ⵎⴽⵍⵍⵉ ⵜⴳⴳ ⵜⵔⴰⴱⴱⵓⵜ ⴰⴷ, ⵉⴷⴷⵖ ⵜⴰⵎⴰⵣⵉⵖⵜ ⴷ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⵉⵏ ⵉⵎⵖⵔⵉⴱⵉⵢⵏ ⵎⴰⵕⵕⴰ.

ⵜⵖⵕⴰ "ⵜⴰⴹⴰ ⵜⴰⵎⵖⵔⴰⴱⵉⵜ" ⵉ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⵉⵜⵏ ⴰⴽⴽⵯ ⴰⴷ ⵣⵎⵎⵉⵎⵏ ⵉⵅⴼⴰⵡⵏ ⵏⵏⵙⵏ ⴳ ⵜⵍⴳⴰⵎⵉⵏ ⵏ ⵓⵙⵜⴰⵢ ⵃⵎⴰ ⴰⴷ ⴳⴳⵏ ⴰⵣⵔⴼ ⵏⵏⵙⵏ ⴰⵎⵏⴹⴰⵡ ⴳ ⵜⴷⵔⴰⵡⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵙ ⵜⵖⴰⵔⴰⵙⵜ ⵏ ⵓⵙⵜⴰⵢ ⴷ ⵜⴷⵔⴰⵡⵜ ⴳ ⵜⵙⵉⵙⵜⴰⵏⵜ ⵏ ⵓⵙⵏⴼⵍ ⵏⵏⴰ ⵔⴰⵏ, ⵍⵍⵉ ⵓⵔ ⵉⵣⵎⵉⵔⵏ ⴰⴷ ⵢⵉⵍⵉ ⵖⴰⵙ ⵙ ⵉⵙⵜⴰⵢⵏ ⵓⵣⴷⵉⴳⵏ ⵉⵏⴰⴼⴰⵡⵏ, ⵎⴽⵍⵍⵉ ⵉⵍⵍⴰⵏ ⴳ ⵜⴷⵉⵎⵓⵇⵔⴰⵜⵉⵢⵉⵏ ⴰⴽⴽⵯ.

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B5%9C%E2%B5%89%E2%B5%8E%E2%B4%B0%E2%B5%A2%E2%B5%8F%E2%B5%93%E2%B5%9C%E2%B5%89%E2%B5%8F-%E2%B5%8F-%E2%B5%93%E2%B4%B1%E2%B4%B0%E2%B5%94%E2%B4%B0%E2%B5%A3-%E2%B4%B0%E2%B5%8F%E2%B4%B0%E2%B5%8E%E2%B5%93%E2%B5%94-%E2%B5%9C%E2%B5%8E%E2%B5%8D%E2%B4%B0-%E2%B5%9C%E2%B4%B0%E2%B4%B9%E2%B4%B0-%E2%B5%9C%E2%B4%B0%E2%B5%8E%E2%B5%96%E2%B5%94%E2%B4%B0%E2%B4%B1%E2%B5%89%E2%B5%9C-%E2%B5%9C%E2%B4%B0%E2%B5%8F%E2%B5%8F%E2%B4%B0%E2%B5%A2%E2%B5%9C-%E2%B5%8F%E2%B5%8F%E2%B5%99