"ⵖⵉⴽ ⵍⵍⵉ ⵏⵏⴰⵏ ⵍⴰⵃⴽⴰⵎ ⵏ ⵓⵎⴰⵔⵉ ⵡⵉⵙⵙ 47 ⵙⴳ ⵓⴷⵓⵙⵜⵓⵔ, ⴷ ⵙ ⵓⵙⵓⵎⵔ ⵙⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵙⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⴽⵡⴰⵙ 14 ⴽⵟⵓⴱⵕ 2021, ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ ⴰⴷ ⵉⴳ ⵓⵎⴰⵡⵙⴰⵙ ⵏ ⵜⴷⵓⵙⵉ ⴷ ⵓⵔⴰⵢ ⴰⵏⴰⵎⵓⵏ, ⴳ ⵓⵏⵙⴰ ⵏ ⵎⴰⵙⵙⴰ ⵏⴰⴱⵉⵍⴰ ⵕⵕⵎⵉⵍⵉ.
ⵉⴽⵛⵎ ⵓⵙⵜⴰⵢ ⴰⴷ ⴳ ⵓⵙⴰⵜⵉ ⵏ ⵍⴰⵃⴽⴰⵎ ⵉⴷⵓⵙⵜⵓⵔⵉⵢⵏ, ⵙ ⴷⴼⴼⵉⵔ ⵏ ⵜⵓⵜⵜⵔⴰ ⵍⵍⵉ ⵢⵓⵙⵉ ⵎⴰⵙⵙ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉ ⵜⵏⴰⵢⵜⴰ ⵜⴰⵎⴰⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵉⵙⵙⵓⴼⵖ ⵎⴰⵙⵙⴰ ⵕⵕⵎⵉⵍⵉ ⵙⴳ ⵜⵡⵓⵔⵉⵡⵉⵏ ⵜⵉⵏⴱⴰⴹⵉⵏ.
ⵜⵙⵎⵏⵉⴷ ⵎⴰⵙⵙⴰ ⵕⵕⵎⵉⵍⵉ ⵜⵓⵜⵜⵔⴰ ⵎⵔⴰ ⴰⴷ ⵜⵙⴽⵔ ⵜⵡⵓⵔⵉⵡⵉⵏ ⵏⵏⵙ ⴰⵎⵎ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵜⵖⵔⵎⵜ ⵏ ⴹⴹⴰⵕⵍⴱⵉⴹⴰ, ⴷⴼⴼⵉⵔ ⵍⵍⵉⵖ ⴰⵢⵜ ⵉⴱⴰⵢⵏ ⵉⵙ ⵔⴰⴷ ⵜ ⵉⵅⵚⵚⵓ ⵜⴰⵡⵓⵔⵉ ⵉⵎⵇⵇⵓⵕⵏ ⵍⵍⵉ ⵢⵅⵚⵚⴰⵏ ⵉ ⵜⵎⵙⴽⵉⵔⵜ ⵜⴰⵙⵎⴷⵢⴰⵡⵜ ⴰⴷ, ⴷ ⵎⴰⴷ ⵜ ⵉⵅⵚⵚⴰⵏ ⴰⵎⵎⴰⵙ ⵏ ⵓⴹⴼⴼⵉⵕ ⵏ ⵜⵖⴰⵡⵙⵉⵡⵉⵏ ⵏ ⵉⵎⵣⴷⴰⵖⵏ ⴷ ⵜⵙⵙⵓⵔⵉⵏ ⵉⵕⵥⵎⵏ ⴳ ⵜⵖⵔⵎⵜ ⵜⴰⵎⵇⵕⴰⵏⵜ ⴰⴷ, ⵎⴰ ⵔⴰⴷ ⵉⴳⴳⵔ ⵉ ⵢⵙⵍⴽⴰⵎⵏ ⵏ ⵓⵍⵜⵖ ⵉⴳⴳⵓⵜⵏ ⵏⵏⵙ ⴷ ⵓⴹⴼⴼⵉⵕ ⴰⵡⴰⵙⵙⵏ ⵍⵍⵉ ⵢⵔⴰ ⵉⴳⵔ ⵏ ⵜⴷⵓⵙⵉ, ⵙⵍⴰⵡⴰⵏ ⴰⴽⴽⵯ ⴳ ⵜⵙⵓⵜⵍⵉⵏ ⵏ ⵓⴱⴰⵢⵢⵓⵕ.
ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵃⴼⴹ ⵕⴱⴱⵉ, ⴰⵎⵙⴰⵙⴰ ⵏ ⵓⵙⵓⵎⵔ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴷ ⵉⵙⵜⵉ ⵎⴰⵙⵙ ⴰⵢⵜ ⵟⵟⴰⵍⴱ ⵎⵔⴰ ⴰⴷ ⵉⵔⵏⵓ ⵜⵙⵙⵓⵔⵉⵏ ⵉⵕⵥⵎⵏ ⴷ ⵜⵏⵣⵕⵉⵏ ⵉⵅⵚⵚⴰⵏ ⵉ ⵉⴳⵔ ⵏ ⵜⴷⵓⵙⵉ, ⴳ ⵉⵅⴼ ⵏⵏⵙⵏ ⵜⵔⵏⵓⵜ ⵏ ⵓⵙⵡⵓⴷⴷⵓ ⵏ ⵉⴳⵔ ⴰⴷⵓⵙⴰⵏ ⵏ ⵓⴱⴰⵢⵢⵓⵕ "ⴽⵓⴼⵉⴷ-19", ⴷ ⴰⴼⵓⵍⴽⵉ ⵏ ⵓⵃⵕⵛ ⵏ ⵓⵎⵣⵣⵉⵣⵍ ⴰⵏⴰⵎⵓⵔ ⵏ ⵜⴳⵣⵣⴰⵢⵜ".