ⵉⵙⵙⴳⵎⴷ ⵅⴼ ⵜⵎⵢⴰⵇⵇⴰⵏⵜ ⴰⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⵍⵃⵓⵙⴰⵢⵏ ⵎⵓⵊⴰⵀⵉⴷ ⴷ ⵓⵏⵎⵀⴰⵍ ⵏ ⵓⵙⵉⵏⴰⴳ ⵓⵥⵍⴰⵢ ⴳ ⵜⴰⵜⵉⴽⵏⵓⵍⵓⵊⵉⵜ ⵜⴰⵡⵡⵓⵔⴰⵏⵜ ⴷ ⵜⵉⵏ ⵉⵙⵏⵙⵓⵜⵏ ⴷ ⵜⵎⴰⵍⵍⴰⵢⵜ ⵎⴰⵙⵙ ⵎⵓⵃⵎⵎⴰⴷ ⵃⵜⵜⵓⵛ ⴳ ⵢⴰⵜ ⵜⴼⵓⴳⵍⴰ ⵉⵜⵜⵓⵙⵏⵎⴰⵍⴰⵏ ⵅⴼ ⵜⵖⴰⵡⵙⴰ ⴰⴷ .
ⵖⴰⵍⵏ ⵉⵎⵏⴰⴷⵏ ⴰⴷ ⵏ ⵜⵎⵢⴰⵇⵇⴰⵏⵜ ⴰⴷ ⵙ ⵜⵙⵜⵕⴰⵜⵉⵊⵉⵜ ⴳ ⵓⵙⴽⴽⵉⵔ ⵏ ⵢⴰⵏ ⵡⴰⵀⵉⵍ ⵏ ⵓⵎⵢⴰⵡⴰⵙ ⴰⴼⴰⴷ ⴰⴷ ⵖⵉⵏ ⵓⵏⵍⵎⴰⴷⵏ ⴷ ⵉⵎⵣⵔⴰⵡⵏ ⵏ ⵓⵙⵉⵏⴰⴳ ⴰⴷ ⵏⵏⵓⵕⵥⵎⵏ ⵅⴼ ⵜⴰⵢⵙⵉ ⵏ ⵜⵎⵜⵜⴰ ⴷ ⵡⴰⵔ ⵜⴰⵎⵜⵜⴰ ⵜⴰⵎⴰⵣⵉⵖⵜ, ⵙⴳ ⵓⵙⵙⵉⴷⴼ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⵎⵓⵜⵜⴳ ⴰⵡⵡⵓⵔⴰⵏ ⴳ ⵉⴳⵔ ⵏ ⵉⵙⵏⵙⵓⵜⵏ ⴷ ⵜⵎⴰⵍⵍⴰⵢⵜ ⴰⴼⴰⴷ ⴰⴷ ⵙⴱⵓⵖⵍⵓⵏ ⵜⵉⵏⴰⴼⵓⵜⵉⵏ ⵜⵉⵏⴰⵎⵓⵏⵉⵏ .
ⴳ ⵉⴳⵔ ⴰⴷ , ⵉⵏⵏⴰ ⵓⵏⵎⵀⴰⵍ ⵏ ⵓⵙⵉⵏⴰⴳ ⵏ ⵡⴰⵔⵣⴰⵣⴰⵜ ⴳ ⵢⴰⵏ ⵓⵎⵔⴰⵔⴰ ⵏ ⵡⴰⵡⴰⵍ ⵏⵏⵙ ⴷ ⵜⵙⵏⵓⵔⴰⵢⵜ ⵏ ⵓⵙⵏⵖⵎⵙ ⴰⵎⵖⵔⵉⴱⵉ ⵎⴰⵙⴷ ⵜⴰⵎⵢⴰⵇⵇⴰⵏⵜ ⴰⴷ ⵔⴰⴷ ⵜⵙⵙⴷⵓⵙ ⵜⵉⵡⵉⵙⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⴳⵔ ⵏ ⵉⵙⵏⵙⵓⵜⵏ ⴷ ⵜⵎⴰⵍⵍⴰⵢⵜ ⴷ ⵓⵏⵏⵓⵕⵥⵎ ⵅⴼ ⵜⴰⵢⵙⵉ ⵏ ⵜⵎⵜⵜⴰ ⴷ ⵜⵉⵏ ⵜⴰⵔ ⵜⴰⵎⵜⵜⴰ ⴳ ⵉⴳⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .
ⵉⵣⴰⵢⴷ ⵎⴰⵙⵙ ⵃⵜⵜⵓⵛ, ⵉⵏⵏⴰ ⵎⴰⵙⴷ ⵜⴰⵎⵢⴰⵇⵇⴰⵏⵜ ⴰⴷ ⵔⴰⴷ ⵜⴰⵡⵙ ⴳ ⵓⵙⴽⴽⵉⵔ ⵏ ⵢⴰⵏ ⵓⵏⵎⴰⵍⴰ ⴳ ⵉⴳⵔ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴷ ⵓⵙⵙⵉⴹⵏ ⵏ ⵜⵉⵔⴰⵎ ⵜⵉⵎⴰⵣⵉⵖⵉⵏ ⴰⴼⴰⴷ ⴰⴷ ⵉⴱⵓⵖⵍⵓ ⵉⴳⵔ ⴰⴷ, ⴷ ⵓⵙⵏⵎⴰⵍⴰ ⵏ ⵜⵙⵙⵓⵜⵍⵉⵏ ⵏ ⵓⵙⵎⵓⵜⵜⴳ ⵉⵏⴰⵎⵓⵔⵏ ⴷ ⵉⵙⴳⴰⵡⴰⵏⵏ ⴳ ⵉⴳⵔ ⴰⴷ , ⵎⴽⵍⵍⵉ ⵉⵜⵜⵓⵙⴽⴰⵔ ⵢⴰⵏ ⵓⵎⴰⵡⴰⵍ ⵉⵣⴷⵉⵏ ⴷ ⵉⴳⵔ ⵏ ⵜⵉⵔⴰⵎ ⴷ ⵉⵙⵏⵙⵓⵜⵏ ⴷ ⵜⵎⴰⵍⵍⴰⵢⵜ , ⵙⵍⴰⵡⴰⵏ ⴰⴽⴽⵯ ⵎⴰⵙⴷ ⵡⴰⵔⵣⴰⵣⴰⵜ ⵜⵍⵍⴰ ⴳⵉⵙ ⵢⴰⵜ ⵜⵣⵓⵏⵉ ⵉⵣⴷⵉⵏ ⴷ ⵓⵏⵡⴰⵍ ⴰⵎⵖⵔⵉⴱⵉ .
ⴳ ⵜⵙⴳⴰ ⵢⴰⴹⵏ , ⵉⵏⵏⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⴷ ⵜⴰⵎⵢⴰⵇⵇⴰⵏⵜ ⴰⴷ ⵜⵓⵛⴽⴰⴷ ⴳ ⵓⵙⴰⵜⵉ ⵏ ⵜⵣⵎⵎⴰⵔ ⵏ ⵜⵏⴱⴰⴹⵜ ⴳ ⵓⵙⴷⵓⵙ ⵏ ⵓⵣⵣⵓⴳⵣ ⵏ ⵜⵓⵏⵚⵉⴱⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵙⵉⴷⴼ ⵏⵏⵙ ⴳ ⵜⵎⵔⵙⴰⵍ ⴰⴽⴽⵯ ⵏ ⵓⵙⵙⵍⵎⴷ .
ⵉⵣⴰⵢⴷ ⵎⴰⵙⵙ ⵎⵓⵊⴰⵀⵉⴷ ⵉⵏⵏⴰ ⵎⴰⵙⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⴳⴰ ⴰⵎⴷⵔⴰⵡ ⴷ ⵓⵎⵙⵜⴳⴳⴰⵔ ⴳ ⵉⴳⵔ ⵏ ⵓⵙⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵎⵔⵙⴰⵍ ⴰⴽⴽⵯ ⵏ ⵓⵙⵙⵍⵎⴷ ⴳ ⵉⴳⵔ ⵏ ⵓⵙⵎⵓⵜⵜⴳ ⴷ ⵓⵙⵓⵖⵍ ⴷ ⵓⵎⵢⴰⵡⴰⴹ, ⴰⴼⴰⴷ ⴰⴷ ⵉⵙⵙⴷⵓⵙ ⵜⵉⵣⵎⵎⴰⵔ ⵏ ⵉⴳⵎⴰⵎⵏ ⴷ ⵡⴰⵎⵎⴰⵥ ⵏ ⵉⵏⵍⵎⴰⴷⵏ ⵏ ⵜⵉⵏⵎⴰⵍ ⴷ ⵜⵎⵔⵙⴰⵍ ⵏ ⵜⵓⵎⵍⴰⵢⵉⵏ ⵉⵣⴷⵉⵏ ⴷ ⵜⵎⴰⵣⵉⵖⵜ , ⵙ ⵓⵙⵎⵔⵙ ⵏ ⵜⵣⵎⵎⴰⵔ ⵜⵉⴳⵍⴷⴰⵏⵉⵏ .
ⴳ ⵓⵎⵏⵉⴷ ⵢⴰⴹⵏ, ⵉⵏⵏⴰ ⵓⵏⵙⵙⵉⵅⴼ ⵏ ⵜⵏⴰⴼⵓⵜ ⵏ ⵓⴷⴼⵓⵔ ⵏ ⵓⵙⵎⵓⵜⵜⴳ ⴳ ⵜⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⵎⴰⵙⵙ ⵎⵓⵍⴰⵢ ⵎⵙⵟⴰⴼⴰ ⵟⴰⵀⵉⵕ ⵍⵄⴰⵍⴰⵡⵉ, ⵎⴰⵙⴷ ⵜⴰⴷⵔⴰⵡⵜ ⴰⴷ ⵜⴳⴰ ⴳ ⵢⴰⵏⵜ ⵜⵙⵜⵕⴰⵜⵉⵊⵉⵜ ⵏ ⵓⵙⵉⵏⴰⴳ ⴳ ⵎⴰⴷ ⵉⵣⵍⵉⵏ ⵙ ⵓⵙⵎⵓⵜⵜⴳ ⴷ ⵓⵣⵣⵓⴳⵣ ⵏ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⴰⵎⵖⵔⵉⴱⵉ ⴳ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵙⵙⵍⵎⴷ ⴰⴼⴰⴷ ⴰⴷ ⴰⵎⵥⵏ ⵉⵎⵣⵔⴰⵡⵏ ⵎⴰⴷ ⴰⴽⴽⵯ ⵉⵣⴷⵉⵏ ⴷ ⵜⵓⵙⵙⵏⴰ ⴷ ⵜⵓⵜⵍⴰⵢⵜ ⵜⵉⵎⴰⵣⵉⵖⵉⵏ .
ⵉⴳⴰ ⵓⵙⵉⵏⴰⴳ ⵏ ⵡⴰⵔⵣⴰⵣⴰⵜ ⵢⴰⵏ ⵓⵙⵉⵏⴰⴳ ⵉⵥⵍⵉⵏ ⴳ ⵓⵙⵎⵓⵜⵜⴳ ⵏ ⵜⴰⵣⵣⵓⵍⵉⵏ ⵏ ⵉⵙⵏⵙⵓⵜⵏ ⴷ ⵜⵎⴰⵍⵍⴰⵢⵜ ⴷ ⵉⴳⵔ ⵏ ⵜⵎⴳⵓⵔⵉ ⵜⴰⵇⵇⴱⵓⵕⵜ ⴷ ⵜⴷⵎⵙⴰ ⵜⴰⵏⴰⵎⵓⵏⵜ ⵍⵍⴰⵏⵜ ⴳⵉⵙ ⴽⴽⵓⵙⵟ ⵏ ⵜⵓⵣⵓⵏⵉⵏ ⵙⴳ ⴳⵉⵙⵏⵜ ⵜⵓⵣⵓⵏⵜ ⵏ ⵓⵏⵡⴰⵍ ⴰⵎⵖⵔⵉⴱⵉ , ⵔⴰⴷ ⵉⵍⵉⵏⵜ ⴰⵡⴷ ⵙⵎⵎⵓⵙⵜ ⵏ ⵜⵓⵣⵓⵏⵉⵏ ⵢⴰⴷⵏ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⴰⴷ ⵏⵏⴰ ⵉⵜⵜⵓⵙⴽⴰⵔⵏ .