Published on MAPNews (https://www.mapnews.ma/am)

Accueil > ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⵙⴼⵓⴳⵍⴰ ⵙ ⵓⴽⵯⵜⵜⴰⵢ ⵡⵉⵙⵙ 21 ⵏ ⵉⵏⴰⵡ ⴰⴳⵍⴷⴰⵏ ⴳ ⴰⵊⴷⵉⵔ

ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⵙⴼⵓⴳⵍⴰ ⵙ ⵓⴽⵯⵜⵜⴰⵢ ⵡⵉⵙⵙ 21 ⵏ ⵉⵏⴰⵡ ⴰⴳⵍⴷⴰⵏ ⴳ ⴰⵊⴷⵉⵔ

18 ⴽⵟⵓⴱⵕ 2022 Version Imprimable
ⵕⵕⴱⴰⵟ - ⵙⵙⵏⵜⵉⵏ ⴳ ⵡⵙⵙⴰⵏ ⵣⵔⵉⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ , ⵜⵉⴳⴳⵓⵔⴰ ⵉⵏⵏⵓⵕⵥⵎⵏ , ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ ⵓⴽⵯⵜⵜⴰⵢ ⵡⵉⵙⵙ 21 ⵏ ⵉⵏⴰⵡ ⴰⴳⵍⴷⴰⵏ ⴳ ⵓⵊⴷⵉⵔ ⴷⴷⵓ ⵜⵎⴰⵜⴰⵔⵜ -ⵜⵉⵡⵉⵙⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⵎⵙⴰⵙⴰ ⵏ ⵜⵎⴰⵣⵉⵖⵜ - .

ⴰⵡⵜⵜⴰⵙ ⵏ ⵉⵎⵓⵙⵙⵓⵜⵏ ⴰⴷ ⵉⴷⵍⵙⴰⵏⵏ ⴷ ⵡⵉⵏ ⵓⵙⵏⵖⵎⵙ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⵙ ⵓⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵙⴹⵉⵙ ⴰⵔ 21 ⴽⵜⵓⴱⵕ ⴰⴷ,ⴰⴷ ⵙⴽⵓⵏ ⴰⵜⵉⴳ ⴷ ⵜⵉⵍⴰⵍ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵏⵎⴰⵍⵍⵓ ⵏ ⵜⵡⵡⵓⵔⵉⵡⵉⵏ ⵏⵏⵙ ⵅⴼ ⵜⵏⴰⴼⵓⵜ ⵏ ⵓⵙⴷⴷⵉⴷ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵉⵜⴳⴰⵔⵏ ⵏ ⵓⵙⵙⵉⴷⴼ ⵏⵏⵙ ⴳ ⵓⵙⵙⵍⵎⴷ ⴷ ⵓⵙⵏⵖⵎⵙ ⴷ ⵉⴳⵔⴰⵏ ⵢⴰⴹⵏⵉⵏ, ⴰⴼⴰⴷ ⴰⴷ ⵜⵙⴽⵔ ⵜⵉⵍⴰⵍ ⵏⵏⵙ ⴳ ⵎⵏⵉⴷ ⵏ ⵜⵄⵕⴰⴱⵜ .

ⴰⵀⵉⵍ ⵏ ⵓⵙⵙⴰⵏ ⴰⴷ ⴳⵉⵙ ⴰⵙⴼⵙⵔ ⵏ ⵜⵥⵕⵉⴳⵉⵏ ⵏ ⵓⵙⵉⵏⴰⴳ ⴷ ⵜⵙⴰⵡⵓⵔⵉⵏ ⵏ ⵜⵉⵔⵔⴰ ⵙ ⵜⴼⵉⵏⴰⵖ ⴷ ⵉⵡⵉⵣ ⴰⵥⵓⵕⴰⵏ ⴳ ⵓⵎⵣⴳⵓⵏ ⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ .

ⴳ ⵓⵎⵔⴰⵔⴰ ⵏ ⵡⴰⵡⴰⵍ ⵏⵏⵙ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ , ⵉⵏⵏⴰ ⵎⴰⵙⵙ ⵃⵎⴰⴷ ⴱⵓⴽⵓⵙⴰⵏⵙⵙⵉⵅⴼ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⴷ ⵉⵏⴰⵡ ⴰⴳⵍⴷⴰⵏ ⴰⴷ ⵜ ⵉⵏⵚⵕ ⴱⴰⴱ ⵏ ⵉⴳⵏⵡⴰⵏ ⴳ 17 ⴽⵜⵓⴱⵕ 2001 ⵉⴳⴰ ⵢⴰⵏ ⵉⵏⴰⵡ ⴰⵎⵣⵔⵓⵢⴰⵏ ⴷ ⵓⴱⵔⵉⴷ ⴰⵙⵔⵜⴰⵏ ⴳ ⵎⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⴳ ⵜⵎⴰⵣⵉⵔⵜ ⵏⵏⵖ, ⵉⵣⴰⵢⴷ ⵉⵏⵏⴰ ⵎⴰⵙⴷ ⵉⵏⴰⵡ ⴰⴷ ⵉⴳⴰ ⴰⵙⵙⵖⵥⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⴳⴰⵏ ⵜⴰⵢⵙⵉ ⵉⵜⵜⵓⵛⵛⴰⵔⵏ ⵏ ⵉⵎⵖⵔⵉⴱⵉⵏ ⴰⴽⴽⵯ, ⵢⵓⵊⵊⴰ ⵜⵜ ⴰⴷ ⵜⴱⵓⵖⵍⵓ ⴳ ⴽⵉⴳⴰⵏ ⵏ ⵉⴳⵔⴰⵏ ⵏⵏⵙ .

ⵉⵣⴰⵢⴷ ⵎⴰⵙⵙ ⴱⵓⴽⵓⵙ ⵉⵏⵏⴰ ⵎⴰⵙⴷ ⴰⵙⴽⴽⵉⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⵣⵎⵎⴰⵔ ⵏ ⵉⵏⴰⵡ ⴰⴷ ⴰⴳⵍⴷⴰⵏ , ⵉⵙⵎⴷ ⵓⵏⵙⵙⵉⵅⴼ ⵏ ⵓⵙⵉⵏⴰⴳ ⵉⵏⵏⴰ ⵎⴰⵙⴷ ⴰⵙⵉⵏⴰⴳ ⵉⵙⴽⵔ ⴽⵉⴳⴰⵏ ⵏ ⵉⵡⵜⵜⴰⵙⵏ ⵏⵏⵙ ⵙⴳ ⴳⵉⵙⵏ ⴰⵙⵎⵙⴰⵙⴰ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ , ⴷ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵙⴽⴽⵉⵔ ⵏ ⴽⵉⴳⴰⵏ ⵏ ⵉⵙⵏⵓⴱⴱⵓⵛⵏ ⴷ ⵉⵔⵣⵣⵓⵜⵏ ⵏⵏⴰ ⵉⵣⴷⵉⵏ ⴷ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ .

ⴳ ⵜⵙⴳⴰ ⵢⴰⴷⵏ , ⵉⵏⵏⴰ ⵎⴰⵙⵙ ⴱⵓⴽⵓⵙ ⵎⴰⵙⴷ ⴰⵙⵉⵏⴰⴳ ⵖⵉⵍⴰⴷ ⵉⵙⵙⵎⵔⵙ ⴰⴱⵓⵖⵍⵓ ⴰⵜⵉⴽⵏⵓⵍⵓⵊⵉ ⴰⵜⵔⴰⵔ ⴳ ⵉⴳⵔ ⵏ ⵓⵎⵢⴰⵡⴰⴹ, ⵉⵙⵙⵎⵔⵙ ⴰⵡⴷ ⵉⵙⵓⴳⴰⵎ ⵓⵟⵟⵓⵏⴰⵏⵏ ⴳ ⵉⴳⵔ ⵏ ⵓⵙⵙⵍⵎⴷ ⴷ ⵜⴷⵍⵙⴰ, ⴰⴼⴰⴷ ⴰⴷ ⵉⵣⵔⵉ ⵉⵎⵓⴽⵔⵉⵙⵏ ⵏ ⵡⴰⴷⴰⴼ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .

ⵉⵙⵎⴷ ⵎⴰⵙⵙ ⴱⵓⴽⵓⵙ ⴰⵡⴰⵍ ⵏⵏⵙ ⵎⴰⵙⴷ ⴰⵙⵉⵏⴰⴳ ⵉⵙⵏⵎⴰⵍⴰ ⴳⵔ 17 ⴷ 21 ⴽⵜⵓⴱⵕ ⴰⴷ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⵙⴳ ⴳⵉⵙⵏ ⴰⵣⵓⵣⵣⵔ ⵏ ⵜⵙⵎⵖⵓⵔⵉⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵏ 2021 ⴳ ⴽⵉⴳⴰⵏ ⵏ ⵉⴳⵔⴰⵏ , ⵜⴰⵖⴰⵡⵙⴰ ⴰⴷ ⵏⵏⴰ ⵉⴳⴰⵏ ⴰⵙⵎⵖⵔ ⵏ ⵉⵎⵔⵣⵓⵜⵏ ⴷ ⵉⵏⴰⵥⵕⵏ ⵙⴳ ⵜⵉⵍⴰⵍ ⵏⵏⵙⵏ ⴳ ⵜⵡⵉⵙⵉ ⵏ ⵓⵙⴱⵓⵖⵍⵓ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵢⴰⵜ ⵜⵉⵏⴰⵡⵜ ⵅⴼ ⵓⵙⵏⵜⵍ ⴰⵏⵎⴰⵍⴰ ⵏ ⵓⵙⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ, ⵙ ⵜⵡⵉⵙⵉ ⵏ ⴽⵉⴳⴰⵏ ⵏ ⵉⵎⵔⵣⵓⵜⵏ .

ⴰⵙⵉⵏⴰⴳ ⴰⵔ ⵉⵙⵏⵎⴰⵍⴰ ⵉⵎⵓⵙⵙⵓⵜⵏ ⴰⴷ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ ⵓⴽⵯⵜⵜⴰⵢ ⵏ ⵉⵏⴰⵡ ⴰⴳⵍⴷⴰⵏ ⵏ ⴰⵊⴷⵉⵔ ⵏⵏⴰ ⵉⵎⵢⴰⴷⴰⵙⵏ ⴷ 17 ⴽⵜⵓⴱⵕ ⴽⵓⵏ ⴰⵙⴳⴳⵯⴰⵙ ⴷⴼⴼⵉⵔ ⵍⵍⵉⵖ ⵉⴳⴰ ⵢⴰⵜ ⵜⵎⵙⴰⵔⵜ ⵏ ⵓⵎⵣⵔⵓⵢ ⵏⵏⴰ ⵢⵓⵊⵊⴰⵏ ⵍⵎⵖⵔⵉⴱ ⴰⴷ ⵉⵙⴽⵓ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵙⴱⵓⵖⵍⵓⵜⵜ ⵙⴳ ⵓⵙⴽⵓ ⵏ ⵓⵙⵉⵏⴰⴳ ⵉⵥⵍⵉⵏ ⵙ ⵓⵔⵣⵣⵓ ⴳ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⵉⵎⴰⵣⵉⵖⵉⵏ , ⵎⴰ ⴰⵏⵏ ⴰⴷ ⵢⵓⵊⵊⴰⵏ ⴰⵙⴷⴷⵉⴷ ⵏ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⴷ ⵉⵔⵣⵣⵓⵜⵏ ⵅⴼ ⵜⵓⵜⵍⴰⵢⵜ ⴳ ⵉⴳⵔⴰⵏ ⵏ ⵜⵥⵓⵕⵉ ⴷ ⵓⵙⵏⴼⵍⵓⵍ ⴷ ⵓⵙⴳⵎⵉ ⵓⵍⴰ ⴰⵙⵎⵓⵜⵜⴳ ⴷ ⵓⵙⵎⵔⵙ ⵏ ⵜⴻⵜⵉⴽⵏⵓⵍⵓⵊⵉⵜ ⵜⴰⵜⵔⴰⵔⵜ .

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B4%B0%E2%B5%99%E2%B5%89%E2%B5%8F%E2%B4%B0%E2%B4%B3-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B5%8F-%E2%B5%9C%E2%B5%93%E2%B5%99%E2%B5%99%E2%B5%8F%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C-%E2%B5%89%E2%B5%99%E2%B4%BC%E2%B5%93%E2%B4%B3%E2%B5%8D%E2%B4%B0-%E2%B5%99-%E2%B5%93%E2%B4%BD%E2%B5%AF%E2%B5%9C%E2%B5%9C%E2%B4%B0%E2%B5%A2-%E2%B5%A1%E2%B5%89%E2%B5%99%E2%B5%99-21-%E2%B5%8F-%E2%B5%89%E2%B5%8F%E2%B4%B0%E2%B5%A1-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B4%B3-%E2%B4%B0%E2%B5%8A%E2%B4%B7%E2%B5%89%E2%B5%94