ⴰⵙⵏⴼⴰⵕ ⴰⴷ ⵏⵏⴰ ⵙⵙⵏⵜⴰⵏ ⵉⴳⵎⴰⵎⵏ ⵏ ⵜⵏⴱⴰⴹⵜ ⴷ ⵓⵏⵙⵙⵉⵅⴼ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵉⵎⵙⵜⴳⴳⴰⵔⵏ ⴷ ⵉⵎⵙⵜⴰⵢⵏ, ⵙ ⵓⵙⴽⴽⵉⵔ ⵙ ⵜⵓⵎⵍⴰⵢⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⵍⵍⵉⵖ ⵉⵔⴰⵔ ⵜⴰⵖⴹⴼⵜ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .
ⵎⴽⵍⵍⵉ ⵉⴳⴰ ⵓⵡⵜⵜⴰⵙ ⵏⵏⵙ ⴰⴷ ⵉⵙⵙⵉⴷⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⵎⵙⵙⵓⴳⵓⵔⵉⵏ ⵜⵉⵏⴰⵎⵓⵏⵉⵏ ⴰⴼⴰⴷ ⴰⴷ ⵉⵙⵙⵡⵀⵏ ⴰⴷⴰⴼ ⵏ ⵉⵏⵎⵓⵔⵉⵏ ⵙ ⵜⵏⴰⴼⵓⵜⵉⵏ ⴰⴷ ⵜⵉⵏⴰⵎⵓⵏⵉⵏ ⵙ ⵓⵙⵎⴳⵉⴷⴷⵉ .
ⵜⵜⵓⵙⴳⵎⴰⴹⵏⵜ ⴽⴽⵓⵙⵟ ⵏ ⵜⵎⵢⴰⵇⵇⴰⵏⵉⵏ ⵏ ⵜⴷⵔⴰⵡⵜ ⵏⵏⴰ ⵔⴰⴷ ⵉⵙⵙⵉⴷⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⵏⴰⴼⵓⵜⵉⵏ ⴰⴽⴽⵯ ⴷ ⴽⴽⵓⵥ ⵉⵎⵏⴰⴷⵏ ⵓⵏⴱⵉⴹⵏ ⴰⴼⴰⴷ ⴰⴷ ⵔⵎⵙⵏ ⵡⵉⵏⵏⴰ ⵉⵙⴰⵡⴰⵍⵏ ⵜⴰⵎⴰⵣⵉⵖⵜ ⵜⵉⵏⴰⴼⵓⵜⵉⵏ ⵏ ⵜⵎⵙⵙⵓⴳⵓⵔⵉⵏ .
ⵎⴽⵍⵍⵉ ⵜⵙⵙⴳⵎⴹ ⵜⵎⴰⵡⵙⴰⵙⵜ ⵏ ⵓⵎⵎⵓⵜⵜⵉ ⵓⵟⵜⵓⵏⴰⵏ ⴷ ⵓⵙⴳⴳⴷ ⵏ ⵜⵎⵙⵙⵓⴳⵓⵔⵜ ⵅⴼ ⵜⵎⵢⴰⵇⵇⴰⵏⵜ ⵏ ⵜⴷⵔⴰⵡⵜ ⴷ ⵜⵎⴰⵡⵙⴰⵙⵜ ⵏ ⵜⵖⴹⵎⵜ ⴷ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵡⴰⵔⴰⵢ ⴰⵏⴰⵎⵓⵏ ⴷ ⵜⵎⴰⵡⵙⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ ⴷ ⵜⵎⴰⵡⵙⴰⵙⵜ ⵏ ⵜⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ.
ⵙ ⵜⵎⵍⴷⴰ ⴰⴷ, ⵜⵏⵏⴰ ⵜⵎⴰⵡⵙⴰⵙⵜ ⵏ ⵓⵎⵎⵓⵜⵜⵉ ⵓⵟⵜⵓⵏⴰⵏ ⴷ ⵓⵙⴳⴳⴷ ⵏ ⵜⵎⵙⵙⵓⴳⵓⵔⵉⵏ ⵎⴰⵙⵙⴰ ⵖⵉⵜⴰ ⵎⵣⵡⴰⵔ ⴳ ⵜⴳⵓⵔⵉ ⵏⵏⵙ ⵎⴰⵙⴷ ⵜⴰⵎⵢⴰⵇⵇⴰⵏⵜ ⴰⴷ ⵔⴰⴷ ⵜⵙⵎⴷ ⵢⴰⵏ ⵡⴰⵜⵉⴳ ⴷ ⵡⴰⴷⴷⵓⵔ ⵉ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⴷ ⵓⵙⵖⵓⴷⵓ ⵏ ⵜⴱⴰⴷⵓⵜⵉⵏ ⵏ ⵓⵎⵢⴰⵡⴰⴹ ⴷ ⵓⵙⴱⵓⵖⵍⵓ ⴰⵡⴷ ⵏ ⵓⴽⵓⵙ ⴰⴷⵍⵙⴰⵏ ⴷ ⵜⵖⵔⵎⴰ ⵜⴰⵎⴰⵣⵉⵖⵜ .
ⵎⴽⵍⵍⵉ ⵜⵏⵏⴰ ⵎⴰⵙⴷ ⵜⵉⵣⵎⵎⴰⵔ ⵏ ⴱⴰⴱ ⵏ ⵡⴰⴷⴷⵓⵔ ⴷⵓⵙⵏⵜ ⴳ ⵉⴳⵔ ⴰⴷ , ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵔⴰⵔ ⵜⴰⵖⴹⴼⵜ ⴷ ⵡⴰⵏⵏⴰⵍ ⵉ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⵎⴽⵍⵍⵉ ⵜⵏⵏⴰ ⵎⴰⵙⴷ ⵜⴰⵏⴱⴰⴹⵜ ⵜⴳⴰⵏⵏ ⵜⵉⵣⵎⵎⴰⵔ ⵏⵏⵙ ⴰⴼⴰⴷ ⴰⴷ ⵜⵙⴽⵔ ⴰⵣⵣⵓⴳⵣ ⵏ ⵉⵙⵏⴼⴰⵕⵏ ⵉⵣⴷⵉⵏ ⴷ ⵜⵎⴰⵣⵉⵖⵜ ⵉⵣⴷⵉⵏ ⴷ ⵓⵙⵎⵔⵙ ⵏ ⵜⵎⴰⵣⵉⵖⵜ ⴷ ⵓⵙⵓⵖⵍ ⴷ ⵓⵣⵣⵓⴳⵣ ⵏ ⵜⵎⴰⵣⵉⵖⵜ ⴳ ⵉⵎⵏⴰⴷⵏ ⴰⴽⴽⵯ ⵏ ⵜⵓⴷⵔⵜ .
ⴷ ⵓⵣⵣⵓⴳⵣ ⵏ ⵓⵏⵎⴰⵍⵍⵓ ⴰⵎⴰⴷⴷⴰⵙ ⵏ ⵓⵙⵎⵔⵙ ⵏ ⵜⵓⵜⵍⵍⴰⵢⵜ ⵜⴰⵎⴰⵣⵉⵖⵜ ⴷ ⵡⴰⴷⴷⴰⴷ ⵏⵏⵙ ⵓⵏⵚⵉⴱ , ⵜⵏⵏⴰ ⵎⴰⵙⵙⴰ ⵎⵣⵡⴰⵔ ⵎⴰⵙⴷ ⵜⴰⵏⴱⴰⴹⵜ ⵜⵙⴽⵔ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⴰⴼⴰⴷ ⴰⴷ ⵜⵙⵙⵉⴷⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵜ ⴰⴼⴰⴷ ⴰⴷ ⴰⴼⵉⵏ ⵉⵎⵙⴰⵡⴰⵍⵏ ⵙ ⵜⵎⴰⵣⵉⵖⵜ ⴰⴷ ⵔⵎⵙⵏ ⵣⵓⴷ ⵏⵜⵜⵏⵉ ⵣⵓⴷ ⴰⴽⴽⵯ ⵉⵏⵎⵓⵔⵉⵏ .
ⵜⵏⵏⴰⵎⴰⵙ ⵍⵍⴰⵏⵜ ⵜⵡⵡⵓⵔⵉⵡⵉⵏ ⵏ ⵓⵙⵙⵉⴷⴼ ⵏ ⵜⵎⴰⵣⵉⵖⵜ ⴳ ⵉⴳⵔⴰⵏ ⵏ ⵓⵙⵏⵓⴱⴳ ⴷ ⵓⵙⵡⴰⵍⴰ ⴳ ⵡⴰⵎⵎⴰⵙⵏ ⵏ ⵓⵎⵢⴰⵡⴰⴹ, ⵍⵍⵉⵖ ⵜⵜⵓⴼⴽⴰ ⵜⵎⵍⴷⴰ ⵉ 460 ⵏ ⵓⵎⵙⵡⵡⵓⵔⵉ ⴳ ⵜⴰⵏⵜⴰⵍⵉⵡⵉⵏ ⴰⴽⴽⵯ ⵏ ⵜⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⴷ ⵜⵎⴰⵡⴰⵙⵉⵏ ⴳⵉⵏ ⵉⵎⵙⵜⴳⴳⴰⵔⵏ ⵙ ⵓⵙⵡⴰⵍⴰ ⴷ ⵓⵎⵢⴰⵡⴰⴹ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ
ⵎⴽⵍⵍⵉ ⵜⵏⵏⴰ ⵎⴰⵙ ⵍⵍⴰⵏ 60 ⵏ ⵓⵎⵙⵜⴳⴳⴰⵔ ⵏ ⵓⵎⵢⴰⵡⴰⴹ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⵜⵜⵓⴱⴹⴰⵏ ⴼ ⵡⴰⵎⵎⴰⵙⵏ ⵏ ⵓⵎⵢⴰⵡⴰⴹ, ⵜⵣⴰⵢⴷ ⵜⵏⵏⴰ ⵔⴰⴷ ⵉⵣⴰⵢⴷ ⵓⵟⵟⵓⵏ ⵏ ⵉⵎⵙⵡⵡⵓⵔⵉⵏ ⴰⴷ .
ⵎⴽⵍⵍⵉ ⵉⵏⵏⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⵍⵃⵓⵙⴰⵢⵏ ⵎⵓⵊⴰⵀⵉⴷ ⵎⴰⵙⴷ ⵜⴰⵙⵏⵜⴰⵢⵜ ⵏ ⵓⵙⵏⴼⴰⵔ ⴰⴷ ⵏⵏⴰ ⵉⵣⴷⵉⵏ ⴷ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⵉⴷⴷⴰⴷ ⴳ ⵓⵙⴰⵜⵉ ⵏ ⵜⵖⴹⴼⵜ ⵏⵏⴰ ⵜⵔⴰⵔ ⵜⵏⴱⴰⴹⵜ ⵉ ⵓⵙⵏⴼⴰⵕ ⵉⵣⴷⵉⵏ ⴷ ⵓⵙⵏⵜⵍ ⴰⴷ .
ⵉⵔⴰⵔ ⵓⵙⵉⵏⴰⴳ ⵜⴰⵖⴹⴼⵜ ⵙ ⵜⴷⵔⴰⵡⵜ ⵏⵏⴰ ⵉⵜⵜⵓⴳⴰⵏ ⴳⵔⴰⵙ ⴷ ⵜⵎⴰⵡⵙⴰⵙⵉⵏ ⴷ ⵉⵏⵎⴰⵍⵍⵓⵜⵏ ⵏ ⵡⴰⵎⵓⵏ ⴰⵎⴰⴷⴰⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵙⵙⴳⵎⴹ ⵅⴼ ⴽⵉⴳⴰⵏ ⵏ ⵜⵎⵢⴰⵇⵇⴰⵏⵉⵏ ⵙⵍⴰⵡⴰⵏ ⴰⴽⴽⵯ ⴳ ⵉⴳⵔ ⵏ ⵓⵙⵎⵓⵜⵜⴳ ⴷ ⵜⵉⴽⴽⵉ ⵏ ⵜⵣⵎⵎⴰⵔ ⵙ ⵓⵙⵓⵖⵍ ⴷ ⴽⵉⴳⴰⵏ ⵏ ⵉⴳⵔⴰⵏ .
ⴰⵙⵏⴼⴰⵕ ⵏ ⵓⵣⵣⵓⴳⵣ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⵜⵉⵏⴰⵎⵓⵏⵉⵏ, ⵜⵙⵏⵎⴰⵍⴰⵜ ⵜⵎⴰⵡⵙⴰⵙⵜ ⵏ ⵓⵎⵎⵓⵜⵜⵉ ⵓⵟⵟⵓⵏⴰⵏ ⴷ ⵓⵙⴳⴳⴷ ⵏ ⵜⵎⵙⵙⵓⴳⵓⵔⵜ ⵙ ⵜⴷⵔⴰⵡⵜ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ .