ⵉⵍⵍⴰ ⴳ ⵓⵙⵙⴽⵯⵜⵉ ⴰⴷ ⵏⵏⴰ ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵏ ⵓⵙⵎⵓⵟⵟⵏ ⴷ ⵓⵙⵏⵖⵎⵙ ⴷ ⵓⵏⵍⵢⴰⵍⴽⴰⵎ ⵏⵏⴰ ⵉⴹⴼⵕⵏ ⴰⵙⵉⵏⴰⴳ, ⵜⵉⵣⵎⵎⴰⵔ ⴷ ⵜⵎⵙⴽⴰⵔⵉⵏ ⵏ ⵓⵙⵉⵏⴰⴳ ⴳ ⵙⵏⴰⵜ ⵜⴰⵙⵓⵜⵉⵏ ⴳ ⵢⵉⴳⵔ ⵏ ⵓⵙⵎⵓⵟⵟⵏ ⴰⵎⴰⵣⵉⵖ, ⴰⵡⴷ ⵜⵉⵎⵙⴽⴰⵔⵉⵏ ⵏⵏⴰ ⵔⴰⴷ ⵢⴰⵊ ⴰⵙⴽⴽⵉⵍ ⵏ ⵜⴼⵉⵏⴰⵖ ⴰⴷ ⵉⴽⵛⵎ ⵙ ⵢⵉⴳⵔ ⵏ ⵓⵙⵎⵓⵟⵟⵏ.
ⵙ ⵜⵎⵍⴷⴰ ⴰⴷ ⵉⵏⵏⴰ ⵓⵏⵙⵙⵉⵅⴼ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⴰⵃⵎⴰⴷ ⴱⵓⴽⵓⵙ ⴳ ⵜⴳⵓⵔⵉ ⵏⵏⵙ ⵎⴰⵙ ⴷ ⴰⵙⴽⴽⵉⵍ ⵏ ⵜⴼⵉⵏⴰⵖ ⵉⴳⴰ ⵜⵉⵔⵔⴰ ⵉ ⵉⵎⵙⵍⵉ ⵜⴰⵇⴱⵓⵕⵜ, ⵎⴽ ⵍⵍⵉ ⵙ ⵉⵜⵜⴰⵡⵙⵙⴰⵏ ⵓⵙⴽⴽⵉⵍ ⴰⴷ ⵙ ⵜⴼⵔⴰⵔⵜ ⴷ ⵜⵎⵙⵡⵓⵔⵉⵜ.
ⵎⴽ ⵍⵍⵉ ⵙ ⵉⴳⴰ ⵓⵙⴽⴽⵉⵍ ⵏ ⵜⴼⵉⵏⴰⵖ ⵢⴰⵜ ⵜⴱⵔⵉⴷⵜ ⵏ ⵓⵃⵟⵟⵓ ⴳ ⵜⵙⴽⵯⵜⴰⵢⵜ ⴷ ⵓⵎⵣⵔⵓⵢ ⴰⵎⴰⵣⵉⵖ, ⴷ ⵉⵥⴹⴰⵕ ⴰⴷ ⵉⵇⵇⵉⵎ ⵎⵇⵇⴰⵔ ⵉⵜⵜⵉⵏⵜ ⵜⵓⴳⵜⵜ ⵏ ⵜⵓⵜⵍⴰⵢⵉⵏ ⵜⵉⵇⴱⵓⵔⵉⵏ ⵢⴰⴹⵏ.
ⴳ ⵓⵙⴰⵜⵉ ⴰⴷ ⵉⵙⵙⵉⵎⵖⵔ ⵓⵏⵙⵙⵉⵅⴼ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵡⴰⴷⴷⵓⵔ ⵏⵏⴰ ⵉⴼⴽⴰ ⴰⴼⴰⴷ ⴰⴷ ⵉⵙⵙⴷⵔ ⵓⵙⴽⴽⵉⵍ ⴰⴷ, ⵉ ⵉⵇⵇⴰⵏ ⴷ ⴰⴷ ⴰⵙ ⵏⴼⴽ ⵜⵉⵏⴷⵉ ⴷ ⴰⴷ ⵉⵙⵓⵍ ⴰⴷ ⵉⵙⵙⴰⵏ ⵡⴰⵣⵣⴰⵏ .
ⴳ ⵜⵙⴳⴰ ⵢⴰⴹⵏ, ⵜⵙⴷⴷⵉⴷ ⵜⵏⵎⵀⴰⵍⵜ ⵏ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵏ ⵓⵙⵎⵓⵟⵟⵏ ⴷ ⵓⵙⵏⵖⵎⵙ ⴷ ⵓⵏⵍⵢⴰⵍⴽⴰⵎ ⵙⵉⵀⴰⵎ ⴱⵓⵍⵇⵏⴰⴷⵍ ⴳ ⵢⴰⵏ ⵓⵎⵙⴰⵡⴰⵍ ⵉ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵢⵜ ⵏ ⵓⵙⵏⵖⵎⵙ ⵎⴰⵙ ⴰⴽⵛⵛⵓⵎ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⵙ ⵉⵙⴼⵙⴰⵔⵏ ⵉⵎⴰⴹⵍⴰⵏ ⵢⵓⵏⵉⴽⵢⵓⴷ ⵜⴳⴰ ⵢⴰⵜ ⵜⵎⴰⵜⴰⵔⵜ ⵏ ⵓⵙⵏⴼⵍ ⵓⵔ ⴷ ⵖⴰⵙ ⴳ ⵓⵎⵣⵔⵓⵢ ⵏ ⵜⴼⵉⵏⴰⵖ ⵎⴰⵛⵛ ⴳ ⵓⵎⵣⵔⵓⵢ ⵏ ⵜⵎⴰⵣⵉⵖⵜ ⴰⴽⴽⵯ .
ⵜⵙⵙⴽⵯⵜⵉ ⴷ ⴳ ⵓⵙⴰⵜⵉ ⵎⴰⵙ ⴷ ⴰⵙⵙⵖⵥⵏ ⵏ ⵜⵎⴰⴳⵔⴰⵡⵜ ⵉⵣⵓ ⵙ ⵓⵙⴽⴽⵉⵍ ⴰⴷ ⵉⴼⴽⴰ ⵉ ⵜⵎⴰⵣⵉⵖⵜ ⴰⴷ ⵜⵎⵎⴰⵜⵜⵉ ⵙⴳ ⵜⵓⵜⵍⴰⵢⵜ ⵜⴰⵎⵉⵡⴰⵏⵜ ⴷ ⵜⴰⵢⵙⵉ ⵙ ⵜⵓⵜⵍⴰⵢⵜ ⵜⴰⵜⵔⴰⵔⵜ ⵉⵍⵍⴰⵏ ⴳ ⵢⵉⴳⵔ ⵏ ⵜⴰⵜⵉⴽⵏⵓⵍⵓⵊⵉⵜ, ⵎⴽ ⵍⵍⵉ ⵙ ⴱⴰⵀⵔⴰ ⵢⵉⵡⵙ ⵓⵙⵉⵏⴰⴳ ⴷ ⵉⵙⵙⵡⵓⵔⵉ ⵅⴼ ⵉⵙⵓⴳⴰⵎ ⵉⵎⵓⵟⵟⵓⵏⵏ ⵏⵏⴰ ⵔⴰⴷ ⵉⵙⵎⴽⵍ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵏⵏⴰ ⵔⴰⴷ ⵙ ⵜⵜ ⵉⵙⵙⴽⵛⵎ ⵙ ⵓⵙⴰⵢⵔⵓⵔ ⴰⵙⵎⵓⵟⵟⵓⵏ.
ⴰⵙⵙ ⵏ 24 ⵢⵓⵏⵢⵓ ⵏ ⴽⵓ ⴰⵙⴳⴳⵯⴰⵙ ⵉⴳⴰ ⴰⵙⵙ ⵏ ⵓⵙⵎⵖⵔ ⵏ ⵓⵙⵉⵏⴰⴳ ⵙ ⵓⵙⴱⵔⵣ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⴳ ⵉⴳⵔ ⵓⵟⵟⵓⵏⴰⵏ ⴷ ⵓⵙⴷⵓⵙ ⵏ ⵉⵏⵎⴰⵍⵍⵓⵜⵏ ⵏ ⵜⵙⵏⵎⴰⵍⴰⵢⵜ .