ⵉⴳⴰ ⵓⴽⵜⵜⴰⵢ ⴰⴷ ⵎⵇⵇⵓⵔⵏ (18 ⵏⵓⵡⴰⵏⴱⵉⵔ ⴳ ⴽⵓ ⴰⵙⴳⴳⵯⴰⵙ) ⵣⴳ ⵉⴽⵜⵜⴰⵢⵏ ⵉⵎⵣⵔⵓⵢⴰⵏⵏ ⵍⵍⵉ ⴳ ⴷ ⵜⵣⵔⵉ ⵜⴳⵍⴷⵉⵜ, ⵜⴳ ⵜⴰⵏⴼⵓⵙⵜ ⵜⴰⵏⴰⵎⵓⵔⵜ ⵉⴷⴷⵔⵏ ⴳ ⵓⵍⴰⵡⵏ ⵏ ⵉⵎⵖⵔⴰⴱⵉⵢⵏ, ⵙ ⴰⵢⵍⵍⵉ ⵜⵓⵙⵉ ⵏ ⵉⵜⴰⴳⴳⵏ ⵉⵅⴰⵜⴰⵔⵏ ⴷ ⵓⵙⴼⴰⵙⴽⴰ ⴰⵎⵖⵍⵓⵍ ⵉⴷⴷⵔⵏ ⴳ ⵓⵎⵣⵔⵓⵢ ⵏ ⵜⵎⵓⵔⵜ ⵜⴰⵎⵖⵔⴰⴱⵉⵜ.
ⵢⵓⵛⴽⴰ ⴷ ⵓⴽⵜⵜⴰⵢ ⵏ ⵜⴼⵓⴳⵍⴰ ⵏ ⵜⵙⵉⵎⴰⵏⵜ, ⵉⴳ ⵢⴰⵏ ⵉⵎⵉⵔ ⴰⵎⵣⵔⵓⵢⴰⵏ ⴼⴰⴷ ⴰⴷ ⴳⵉⵙ ⵏⵙⵎⴰⵇⵇⵍ ⴰⵙⴰⵔⵓ ⵏ ⵓⵙⴼⴰⵙⴽⴰ ⴰⵏⴰⵎⵓⵔ ⵅⴼ ⵜⵍⴻⵍⵍⵉ ⴷ ⵜⵙⵉⵎⴰⵏⵜ ⴷ ⵜⵎⵢⵉⵡⵏⵜ ⵜⴰⴽⴰⵍⴰⵏⵜ, ⴳ ⵓⵎⵏⴰⴹ ⵏ ⵜⵖⵏⵙⴰ ⵉⵙⵎⵓⵏⴰⵏ ⴳⵔ ⵓⴷⴰⴱⵓ ⴷ ⵓⵖⵔⴼ, ⵉⵙⵎⴷ ⵜⴰⴼⵍⵙⵜ ⵉⵍⵍⴰⵏ ⴳⵔⴰⵜⵙⵏ, ⴰⴷ ⴹⴼⵕⵏ ⴰⴱⵔⵉⵏ ⵏ ⵓⵙⴱⵓⵖⵍⵓ ⴳ ⴽⵓ ⵉⴳⵔⴰⵏ ⴼⴰⴷ ⴰⴷ ⵜⵍⴽⵎ ⵜⴳⵍⴷⵉⵜ ⴰⴷⵖⴰⵔ ⴷ ⴷⵉⵙ ⵢⵓⵙⴰⵏ ⴳⵔ ⵜⵎⵉⵣⴰⵔ ⵏ ⵓⵎⴰⴹⴰⵍ.
ⴳⴳⵓⴷⵉⵏ ⵉⵎⵏⵖⵉⵡⵏ ⵉⴳⴷⵓⴷⴰⵏⵏ ⵍⵍⵉ ⵙⴽⵔⵏ ⵜⴰⵔⵡⴰ ⵏ ⵓⵖⵔⴼ ⴰⵎⵖⵔⴰⴱⵉ ⴳ ⴽⵓ ⵜⵙⴳⵉⵡⵉⵏ ⵏ ⵜⴳⵍⴷⵉⵜ ⵎⴳⴰⵍ ⵏ ⵓⵎⴷⴷⵓⵔⵔⵓⵢ ⴰⴱⵕⵕⴰⵏⵉ. ⵣⴳⵉⵙⵏ , ⵉⵎⵏⵖⵉ ⵏ ⵍⵀⵔⵉ ⴷ ⵓⵏⵡⴰⵍ ⴷ ⴱⵓⴳⴰⴼⵔ ⴷ ⵓⴷⵔⴰⵔ ⵏ ⴱⴰⴷⴷⵓ ⴷ ⵙⵉⴷⵉ ⴱⵓⵄⵜⵎⴰ ⴷ ⵜⵏⴽⵔⴰ ⵏ ⵜⵇⴱⵉⵍⵉⵏ ⵏ ⴰⵢⵜ ⴱⴰⵄⵎⵕⴰⵏ ⴷ ⵜⵎⵏⴰⴹⵉⵏ ⵏ ⵉⴼⴼⵓⵙ ⴷ ⴽⵉⴳⴰⵏ ⵏ ⵉⵎⵖⵉⵡⵏ ⴳ ⵎⵍⴰⵏ ⵉⵏⵥⴱⴰⵢⵏ ⵉ ⵓⵎⴷⴷⵓⵔⵔⵓⵢ ⵜⴰⵥⵥⵉⴹⵕⴰ ⵏⵏⵙⵏ ⴷ ⵓⵙⴼⴰⵙⴽⴰ.
ⴷ ⵣⴳ ⵉⵙⵔⵓⵙⵏ ⵉⵎⵣⵔⵓⵢⴰⵏⵏ ⵍⵍⵉⴳ ⴷ ⵜⵣⵔⵉ ⵜⵎⵓⵔⵜ ⵏⵏⵖ, ⴰⵔⵣⴰⴼ ⵏ ⵓⵏⴱⵔⴰⵣ ⵏ ⵓⵙⵍⴻⵍⵍⵉ ⵉⴳⵍⵍⵉⵏ ⵏ ⵎⵓⵃⵎⵎⴰⵏ ⵡⵉⵙⵙ ⵙⵎⵎⵓⵙ ⵙ ⵟⴰⵏⵊⴰ ⴰⵙⵙ ⵏ 9 ⴰⴱⵔⵉⵍ 1947, ⵍⵍⵉⴳ ⵉⵎⵍⴰ ⵓⵟⵟⵓⴼ ⵏⵏⵙ ⴳ ⵜⵎⵢⵉⵡⵏⵜ ⵏ ⵍⵎⵖⵔⵉⴱ, ⴰⴳⵍⵍⵉⴷ ⴷ ⵓⵖⵔⴼ, ⴷ ⵙ ⵜⵍⴻⵍⵍⵉ ⵏ ⵜⵎⵓⵔⵜ ⴷ ⵜⵎⵢⵉⵡⵏⵜ ⵏⵏⵙ ⵜⴰⴽⴰⵍⴰⵏⵜ ⴷ ⵜⵔⵙⴰⵍ ⵏ ⵜⵎⴰⴳⵉⵜ ⵏⵏⵙ.
ⴹⴰⵕⵜ ⵏ ⵓⵔⵣⴰⴼ ⴰⵏⵏ ⵉⴽⵜⵓⵔⵏ ⵙ ⵜⵏⴷⵉⵜⵉⵏ ⵏ ⵓⵙⵍⴻⵍⵍⵉ ⵣⴳ ⵓⵎⴷⴷⵓⵔⵔⵓⵢ, ⵉⵙⵎⴷ ⵓⵎⴷⴷⵓⵔⵔⵓⵢ ⵍⵀⵔⵛⴰⵏ ⵏⵏⵙ, ⵙⵍⴰⵡⴰⵏⴷ ⴰⴽⴽⵯ ⵍⵍⵉⴳ ⵓⵔ ⵉⵔⵉ ⵓⴳⵍⵍⵉⴷ ⴰⴷ ⴰⵙⵏ ⵉⴽⵛⵎ ⴰⴼⵓⵙ, ⵎⴰⵢⴰⵏ ⴰⴷ ⵅⴼ ⴰⵙ ⵃⵉⵢⵢⵍⵏ ⴰⵣⵡⴰⴳ.
ⴳ ⵜⵉⵣⵉ ⵍⵍⵉⴳ ⵜⵎⵓⵏ ⵜⵓⵎⴰⵙⵜ ⵜⴳ ⵢⴰⵏ ⵓⴼⵓⵙ, ⴰⵔ ⵜⵎⵎⴰⵍ ⴰⴽⵜⵜⴰⵢ ⵏ ⵜⵥⵥⵉⴹⵕⴰ ⵏ ⵢⴰⵏ ⵓⵖⵔⴼ ⵉⵎⵓⵏⵏ ⴹⴰⵕⵜ ⵏ ⵓⴳⵍⵍⵉⴷ ⵏⵏⵙ, ⵜⵙⵙⵏⵜⴰ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵖⵔⴼ ⴰⵙⵙ ⵏ 20 ⵖⵓⵛⵜ 1953, ⵍⵍⵉⵙ ⵔⴰⴷ ⵙⴼⵓⴳⵍⴰⵏⵜ ⵜⵙⵓⵜⵉⵡⵉⵏ ⴷ ⵢⵓⵛⴽⴰⵏ ⴼⴰⴷ ⴰⴷ ⴱⴷⴷⴰ ⴽⵜⵉⵏⵜ ⴰⵙⴼⴰⵙⴽⴰ ⵙⴽⵔⵏ ⴰⵢⵜ ⴷⴰⵔⵙⵏ ⴳ ⵓⵣⵎⵣ ⴰⵏⵏ ⴼⴰⴷ ⴰⴷ ⵟⵟⴰⵢⵏ ⴰⵎⴷⴷⵓⵔⵔⵓⵢ ⵔⴰⵔⵏ ⴷ ⵜⵉⵍⴻⵍⵍⵉ ⵏ ⵜⵎⴰⵣⵉⵔⵜ ⵏ ⵍⵎⵖⵔⵉⴱ.
ⵜⵔⵏⴰ ⵜⵉⵔⵉⵜ ⵉⴷⵓⵙⵏ ⵏ ⵜⵓⵎⴰⵙⵜ, ⵙ ⵓⵎⵙⴰⵙⴰ ⴷ ⵓⴷⴰⴱⵓ ⵅⴼ ⵜⵏⴷⵉⵜⵉⵏ ⵜⵉⵏⴰⵎⵓⵔⵏ ⵜⵉⴼⵓⵥⴰⵕ, ⵎⴳⴰⵍ ⵉⵖⴰⵡⴰⵙⵏ ⵏ ⵓⵎⴷⴷⵓⵔⵔⵓⵢ ⵍⵍⵉ ⵓⵔ ⵉⵙⵙⵏ ⵉⵣⴷ ⵍⵍⵉ ⵉⵙⵙⵣⵓⴳ ⴱⴰⴱ ⵏ ⵓⴷⴷⵓⵔ ⵉⴳⵍⵍⵉⵏ ⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⴷ ⵜⵓⵊⴰ ⵏⵏⵙ ⵜⴰⵛⵛⵔⵉⴼⵜ, ⵉⵙ ⵉⵙⵙⵔⵖⴰ ⵜⴰⴽⴰⵜ ⵜⴰⵏⴰⵎⵓⵔⵜ ⵜⴰⵎⵖⵔⴰⴱⵉⵜ, ⵉⵣⵔⴱ ⵉⵍⵎⵎⴰ ⵙ ⵜⴳⵉⵔⴰ ⵏ ⵓⵙⴷⴷⵓⵔⵔⵓⵢ ⵏⵏⵙ ⴳ ⵜⵎⵓⵔⵜ ⵏⵏⵖ.