Published on MAPNews (https://www.mapnews.ma/am)

Accueil > ⵍⵎⵖⵔⵉⴱ ⴷ ⵚⴱⵍⵢⵓⵏ, ⵙⵏⴰⵜ ⵜⵎⵉⵣⴰⵔ ⵜⵙⵎⵓⵏ ⵜⵏⵜ "ⵜⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵍⴰⵏ ⵎⵏⵏⴰⵡ ⵓⴷⵎⴰⵡⵏ" (ⵎⴰⵙⵙ ⴰⵍⴱⴰⵕⵉⵚ)

ⵍⵎⵖⵔⵉⴱ ⴷ ⵚⴱⵍⵢⵓⵏ, ⵙⵏⴰⵜ ⵜⵎⵉⵣⴰⵔ ⵜⵙⵎⵓⵏ ⵜⵏⵜ "ⵜⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵍⴰⵏ ⵎⵏⵏⴰⵡ ⵓⴷⵎⴰⵡⵏ" (ⵎⴰⵙⵙ ⴰⵍⴱⴰⵕⵉⵚ)

13 ⵢⵓⵏⵢⵓ 2024 Version Imprimable
ⵎⴰⴷⵔⵉⴷ - ⵉⵏⵏⴰ ⵓⵎⴰⵡⴰⵙ ⵏ ⵜⵡⵡⵓⵔⵉⵡⵉⵏ ⵏ ⴱⵕⵕⴰ ⴷ ⵡⴰⵎⵓⵏ ⵓⵕⵓⴱⴱⵉ ⴷ ⵜⵡⵉⵙⵉ ⴰⵚⴱⵍⵢⵓⵏ, ⵎⴰⵙⵙ ⵅⵓⵙⵉ ⵎⴰⵏⵡⵉⵍ ⴰⵍⴱⴰⵕⵉⵚ, ⵎⴰⵙⴷ ⵍⵎⵖⵔⵉⴱ ⴷ ⵚⴱⵍⵢⵓⵏ ⵍⵍⵉ ⴷⴰⵔ "ⵜⵓⴳⵜⵜ ⵏ ⵜⵣⵔⴰⵢⵉⵏ ⵜⵏⵜ ⵉⵙⵎⵓⵏⵏ ⴳ ⵓⵎⴰⴹⴰⵍ", ⵜⵙⵎⵓⵏ ⵜⵏⵜ ⴰⵙⵙ ⴰⴷ "ⵜⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵍⴰⵏ ⵎⵏⵏⴰⵡ ⵓⴷⵎⴰⵡⵏ".

ⵉⵏⵏⴰ ⵎⴰⵙⵙ ⴰⵍⴱⴰⵕⵉⵚ, ⴳ ⵓⵎⵙⴰⵡⴰⵍ ⵍⵍⵉ ⵉⵥⵍⵉ ⵉ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵢⵉⵏⵖⵎⵉⵙⵏ, ⵙ ⵜⵎⵍⴷⴰ ⵏ ⵡⴰⴷⴰⴼ ⵏⵏⵙ ⵙ ⵍⵎⵖⵔⵉⴱ ⴳ ⵓⵙⵙⴰⵏ ⵏ ⵓⵇⵕⴰⵙ ⴷ ⵓⴽⵡⴰⵙ, ⴳ ⵓⴼⵓⵖ ⵏⵏⵙ ⴰⵎⵣⵡⴰⵔⵓ, ⵎⴰⵙⴷ "ⵜⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵍⵍⴰⵏ ⴳⵔ ⵍⵎⵖⵔⵉⴱ ⴷ ⵚⴱⵍⵢⵓⵏ ⵜⵟⵟⴰⴼ ⵖⵉⵍⴰ ⵎⵏⵏⴰⵡ ⵓⴷⵎⴰⵡⵏ, ⴰⵛⴽⵓ ⵜⵙⵎⵓⵏ ⵜⵓⴳⵜⵜ ⵏ ⵉⴳⵔⴰⵏ, ⵎⴰⵢⴰⴷ ⵙ ⵓⵙⵔⴰⴳ ⵏ ⵜⴽⵕⴹⴰ ⵏ ⵓⴱⵔⵉⴷ ⵍⵍⵉ ⵉⵙⵙⵏⵜⴰⵏ ⵣⴳ ⴰⴱⵔⵉⵍ 2022 ⵙ ⵜⵎⵍⴷⴰ ⵏ ⵡⴰⴷⴰⴼ ⵏ ⵓⵙⵍⵡⴰⵢ ⵏ ⵜⵏⴱⴰⴹⵜ, ⴱⵉⴷⵔⵓ ⵙⴰⵏⵛⵉⵣ, ⵍⵍⵉ ⵏⵏ ⵉⴽⴽⴰⵏ ⵍⵎⵖⵔⵉⴱ ⵙ ⵜⵖⵓⵔⵉ ⵏ ⴱⴰⴱ ⵏ ⵓⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙⵙ ⵚⴹⵉⵚ".

ⵢⵉⵏⵉ ⵓⵙⵍⵡⴰⵢ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵍⵢⵓⵏⵜ, ⵎⴰⵙⴷ "ⵜⴰⴷⵔⴰⵡⵜ ⴳⵔ ⵙⵏⴰⵜ ⵜⵎⵉⵣⴰⵔ ⴰⴷ, ⵜⵓⵎⴰⵏ ⴰⵖ ⵣⵡⴰⵔ ⴳ ⵜⴼⵍⵙⵜ ⵍⵍⵉ ⵉⵍⵍⴰⵏ ⴳⵔⴰⵜⵙⵏ ⵍⵍⵉⵖ ⴳⴰⵏⵜ ⵜⵉⵎⴰⴷⵔⴰⵡⵉⵏ ⵜⵉⵙⵜⵔⴰⵜⵉⵊⵢⵉⵏ, ⵍⵍⵉ ⴷⴰⵔ ⵢⴰⵜ ⵜⵣⴷⴰⵢⵜ ⵜⴰⵙⵔⵜⴰⵏⵜ ⴱⴰⵀⵔⴰ ⵎⵇⵇⵓⵔⵏ ⴷ ⵜⵣⴷⴰⵢⵉⵏ ⵜⵉⵏⴰⴼⴳⴰⵏⵉⵏ ⵉⵜⵜⴷⵓⵙⵏ ⵓⴳⴳⴰⵔ ⴽⵓ ⴰⵙⵙ", ⵉⵙⵎⴷ ⵎⴰⵙⴷ "ⵜⵉⵖⴰⵡⵙⵉⵡⵉⵏ ⴰⴷ ⴰⵔ ⵜⵜⴰⴷⵊⵉⵏⵜ ⵜⴰⴷⵔⴰⵡⵜ ⵉⵍⵍⴰⵏ ⴳⵔ ⵍⵎⵖⵔⵉⴱ ⴷ ⵚⴱⵍⵢⵓⵏ ⴰⴷ ⵜⴳ ⵢⴰⵜ ⴳ ⵜⴷⵔⴰⵡⵉⵏ ⴰⴽⴽⵯ ⵉⴷⵓⵙⵏ ⴳ ⵓⵎⴰⴹⴰⵍ".

ⵉⵎⵍⴰ ⵎⴰⵙⵙ ⴰⵍⴱⴰⵕⵉⵚ ⵎⴰⵙⴷ ⵍⵎⵖⵔⵉⴱ ⵉⴳⴰ "ⵜⴰⵣⵡⴰⵔⵉⵜ ⵏ ⵜⵙⵔⵜⵉⵜ ⵜⴰⴱⵕⵕⴰⵏⵜ ⵏ ⵚⴱⵍⵢⵓⵏ. ⵜⵣⴷⵉ ⴰⵖ ⴷⵉⵙ ⵢⴰⵜ ⵜⴷⵔⴰⵡⵜ ⵉⴷⵓⵙⵏ, ⴷ ⵍⵍⵉ ⴳ ⴰⵔ ⵙⵢⴰⴼⵓⵏⵜ ⵜⵎⵉⵣⴰⵔ ⵙ ⵙⵏⴰⵜ", ⵉⵙⵎⴷ ⵎⴰⵙⴷ "ⴰⵢⵍⵍⵉ ⴰⴽⴽⵯ ⵏⵙⴽⵔ ⵉⴼⵓⵓⴽⵉ ⵉ ⵜⵎⵉⵣⴰⵔ ⴰⴷ ⵙ ⵙⵏⴰⵜ".

ⵎⴰⵢⴰⵏ ⴰ ⵅⴼ ⴰⵔ ⵉⵜⵜⵉⵏⵉ ⵎⴰⵙⵙ ⴰⵍⴱⴰⵕⵉⵚ, ⵎⴰⵙ ⵉⴳⴰ ⵓⵎⵢⴰⵡⴰⵙ ⴳⵔ ⵕⵕⴱⴰⵟ ⴷ ⵎⴰⴷⵔⵉⴷ ⵎⴳⴰⵍ ⵉⵎⴰⴼⵢⴰⵜⵏ ⵏ ⵜⵙⴱⴱⴰⴱⵜ ⴳ ⵓⴼⴳⴰⵏ ⴷ ⵜⴰⵖⵡⵡⴰⵖⵜ "ⵢⴰⵏ ⵓⵎⴷⵢⴰ ⵍⵍⵉ ⴳ ⵔⴰⴷ ⴹⴼⵕⵏⵜ ⵜⵎⵉⵣⴰⵔ ⴰⴹⵏⵉ", ⵉⵙⴰⵡⵍ ⵓⵍⴰ ⵅⴼ ⵜⴷⵔⴰⵡⵉⵏ ⴳ ⵜⵙⴱⴱⴰⴱⵜ ⴷ ⵓⵎⵙⴰⵡⴰⵍ ⴰⵙⵔⵜⴰⵏ ⴱⴷⴷⴰ ⵉⵍⵍⴰⵏ ⴳⵔ ⵜⵎⵉⵣⴰⵔ ⴰⴷ.

ⵢⵉⵏⵉ ⴳ ⵓⵎⵏⵉⴷ ⴰⴷ "ⵎⴰⵙ ⴰⵔ ⴷ ⵜⵜⵉⴳⵓⵜ ⵜⵙⴱⴱⴰⴱⵜ ⵉⵏⵥⵔⴰⵜⵏⵖ. ⵎⴰⵛⵛ ⴰⵢⴷⴰ ⴰⴽⴽⵯ ⵉⴼⵓⵍⴽⵉⵏ ⵍⵍⵉⵖ ⵏⵙⴳⴰⴷⴷⴰ ⵜⵉⵡⵉⵙⵉ ⵜⴰⵙⵔⵜⴰⵏⵜ ⴷ ⵜⵏⴰⴼⴳⴰⵏⵜ ⴳⵔⴰⵜⵏⵖ ⵓⴳⴳⴰⵔ ⴳ ⵉⵙⴳⴳⵯⴰⵙⵏ ⴰⴷ ⵉⴳⴳⵓⵔⴰⵏ. ⵎⴰⵢⴰⴷ ⴰⴷ ⵉⴳⴰⵏ ⵜⵉⵔⵙⴰⵍ ⵍⵍⵉ ⵅⴼ ⵔⴰⴷ ⵏⵙⴽⵓ ⵜⴰⴷⵔⴰⵡⵜ ⵏⵏⴼ ⵜⴰⵙⵜⵔⴰⵜⵉⵊⵉⵜ".

ⴳ ⵓⵎⵏⵉⴷ ⴰⴷ ⵏⵉⵜ, ⵉⵙⵏⵓⵎⵎⵍ ⵓⵎⴰⵡⴰⵙ ⵏ ⵜⵡⵡⵓⵔⵉⵡⵉⵏ ⵏ ⴱⵕⵕⴰ ⴰⵙⴱⵍⵢⵓⵏ, ⵜⴰⵢⴰⴼⵓⵜ ⵏ ⵜⴽⴰⵕⴷⴰ ⵏ ⵓⴱⵔⵉⴷ ⴳⵔ ⵍⵎⵖⵔⵉⴱ ⴷ ⵚⴱⵍⵢⵓⵏ ⵍⵍⵉ ⵉⵙⵙⵏⵜⴰⵏ ⴳ ⴰⴱⵔⵉⵍ 2022 ⵎⴰⵙ ⵜⴳⴰ "ⵜⴰⴷ ⴱⴰⵀⵔⴰ ⵉⴼⵓⵍⴽⵉⵏ".

ⵢⵉⵏⵉ ⴳ ⵓⵎⵏⵉⴷ ⴰⴷ "ⵢⵓⵎⴰⵏ ⵎⴰⵙⴷ ⵜⴰⴱⴰⴼⵓⵜ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵜⴼⵓⵍⴽⵉ ⴱⴰⵀⵔⴰ. ⵏⵙⵙⴷⵓⵙ ⵜⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ. ⵎⴽⵍⵍⵉ ⵜⴳⴰ ⵜⵣⴷⴰⵢⵜ ⵏ ⵜⵉⴷⴷⵓⴽⴽⵍⴰ ⵉⵍⵍⴰⵏ ⴳⵔ ⵜⵎⵉⵣⴰⵔ ⵏⵏⵖ ⵜⴰⵍⵍⵉ ⵉⵍⴽⵎⵏ ⵢⴰⵏ ⵓⵙⵡⵉⵔ ⵢⴰⵜⵜⵓⵢⵏ ⴳ ⵓⵎⵣⵔⵓⵢ, ⴰⵢⵍⵍⵉ ⵔⴰⴷ ⵉⴼⴽ ⵜⴰⵢⴰⴼⵓⵜ ⵏⵏⵙ ⴳ ⵎⵏⵏⴰⵡⵜ ⵜⵙⴳⵉⵡⵉⵏ".

ⵉⵙⵙⵓⵎⴰⵏ ⵓⵎⴰⵙⵙⴰⵢ ⴰⵙⴱⵍⵢⵓⵏ ⴳ ⵢⵉⴳⵔ ⵏ ⵜⴷⵎⵙⴰ, ⵎⴰⵙ ⵉⵍⴽⵎ ⵡⴰⵜⵉⴳ ⵏ ⵜⵙⴱⴱⴰⴱⵜ ⴳⵔ ⵙⴳⵯⴰⵜ ⵜⵎⵉⵣⴰⵔ ⴰⴷ 20 ⵎⵍⵢⴰⵕ ⵏ ⵓⵕⵓ, ⵉⵙⵙⴽⵜⵉ ⵎⴰⵙⴷ ⵚⴱⵍⵢⵓⵏ ⵜⴳⴰ ⵜⵎⵙⵙⴰⵖ ⴷ ⵓⵎⵣⵣⵏⵣ ⴰⵎⵣⵡⴰⵔⵓ ⵏ ⵍⵎⵖⵔⵉⴱ, ⵎⴽⵍⵍⵉ ⵜⴳⴰ ⵜⴳⵍⴷⵉⵜ ⵜⴰⵎⴷⵔⴰⵡⵜ ⵏ ⵜⵙⴱⴱⴰⴱⵜ ⵜⵉⵙⵙ ⴽⵕⴰⴹⵜ ⵏ ⵚⴱⵍⵢⵓⵏ ⴳ ⴱⵕⵕⴰ ⵏ ⵓⵕⵓⴱⴱⴰ, ⵓⵔ ⵜⵜ ⵜⵣⵡⴰⵔ ⴰⵎⵔ ⵎⴰⵔⵉⴽⴰⵏ ⴷ ⵜⴳⵍⴷⵉⵜ ⵉⵎⵓⵏⵏ.

ⵜⴰⵙⴳⴰ ⴰⴹⵏⵉ ⵏ ⵓⵎⵢⴰⵡⴰⵙ ⴰⵎⵖⵔⴰⴱⵉ-ⴰⵚⴱⵍⵢⵓⵏ ⵉⵣⴷⵉ, ⵖⴰⵍⵍⵉ ⵉⵏⵏⴰ ⵎⴰⵙⵙ ⴰⵍⴱⴰⵕⵉⵚ, ⴷ ⵓⴼⵔⴰ ⵎⴳⴰⵍ ⵉⵎⴰⴼⵢⴰⵜⵏ ⵏ ⵜⵙⴱⴱⴰⴱⵜ ⴳ ⵓⴼⴳⴰⵏ ⴷ ⵜⵖⵡⵡⴰⵖⵜ, ⵢⵉⵏⵉ ⵎⴰⵙⴷ ⴰⵎⵢⴰⵡⴰⵙ ⴰⴷ "ⵉⴳⴰ ⴰⵎⴷⵢⴰ ⴰⴷ ⴳⵉⵙ ⴰⴽⴽⵯ ⵍⵎⴷⵏⵜ ⵜⵎⵉⵣⴰⵔ ⵏ ⵓⵎⴰⴹⴰⵍ, ⴷ ⵜⵙⵙⴷⵓⵙⵜ ⵜⴽⴰⵕⴹⴰ ⵏ ⵓⴱⵔⵉⴷ ⵜⴰⵎⴰⵢⵏⵓⵜ".

ⵓⴳⴳⴰⵔ ⵏ ⵎⴰⵢⴰ, ⵉⵣⵎⵎⵉⵎ ⵓⵙⵍⵡⴰⵢ ⴰⴷⵉⴱⵍⵓⵎⴰⵙ ⵏ ⵚⴱⵍⵢⵓⵏ ⵎⴰⵙ "ⴷⵓⵙⵏⵜ ⵓⴳⴳⴰⵔ ⵜⵣⴷⴰⵢ ⵜⵉⵏⴰⴼⴳⴰⵏⵉⵏ ⵉⵍⵍⴰⵏ ⴳⵔ ⵙⵏⴰⵜ ⵜⵎⵉⵣⴰⵔ ⴰⴷ", ⵉⵎⵍ ⴳ ⵓⵎⵏⵉⴷ ⴰⴷ ⵎⴰⵙⴷ "ⵓⴳⴳⴰⵔ ⵏ ⵎⵍⵢⵓⵏ ⵏ ⵓⵎⵖⵔⵉⴱⵉ ⴷⴷⵔⵏ ⴳ ⵚⴱⵍⵢⵓⵏ ⵙ ⵓⴼⵔⴰ, ⴷ ⴰⵔ ⵜⵜⴰⵡⵙⵏ ⴳ ⵓⴱⵓⵖⵍⵓ ⵏⵏⵙ".

Source URL: https://www.mapnews.ma/am/actualites/%E2%B5%9C%E2%B4%B0%E2%B5%99%E2%B5%94%E2%B5%9C%E2%B5%89%E2%B5%9C/%E2%B5%8D%E2%B5%8E%E2%B5%96%E2%B5%94%E2%B5%89%E2%B4%B1-%E2%B4%B7-%E2%B5%9A%E2%B4%B1%E2%B5%8D%E2%B5%A2%E2%B5%93%E2%B5%8F-%E2%B5%99%E2%B5%8F%E2%B4%B0%E2%B5%9C-%E2%B5%9C%E2%B5%8E%E2%B5%89%E2%B5%A3%E2%B4%B0%E2%B5%94-%E2%B5%9C%E2%B5%99%E2%B5%8E%E2%B5%93%E2%B5%8F-%E2%B5%9C%E2%B5%8F%E2%B5%9C-%E2%B5%9C%E2%B4%B7%E2%B5%94%E2%B4%B0%E2%B5%A1%E2%B5%9C-%E2%B5%9C%E2%B4%B0%E2%B5%99%E2%B5%9C%E2%B5%94%E2%B4%B0%E2%B5%9C%E2%B5%89%E2%B5%8A%E2%B5%89%E2%B5%9C-%E2%B5%89%E2%B5%8D%E2%B4%B0%E2%B5%8F-%E2%B5%8E%E2%B5%8F%E2%B5%8F%E2%B4%B0%E2%B5%A1-%E2%B5%93%E2%B4%B7%E2%B5%8E%E2%B4%B0%E2%B5%A1%E2%B5%8F-%E2%B5%8E%E2%B4%B0%E2%B5%99%E2%B5%99