ⴼ ⵖⵉⴽⴰⵏⵏ, ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵡⵓⵔⵉⵡⵉⵏ ⵏ ⵜⵓⵚⴽⴰ ⵏ ⵢⴰⵏ ⵓⴷⴷⵉⵙ ⴱⵓ ⵜⵓⴳⵜ ⵏ ⵉⴳⵔⵏ ⵏ ⵉⴼⴳⴰⵏⵏ ⵉⵟⵟⴰⴼⵏ ⵉⵙⵙⴰⵔⵏ ⵉⵥⵍⵉⵏ ⴳ ⵜⵎⴷⵉⵏⵜ ⵏ ⵍⴼⵇⵉⵀ ⴱⵏⵚⴰⵍⵃ (3,1 ⵓⵎⵍⵢⵓⵏ ⵏ ⴷⴷⵔⵀⵎ), ⴷ ⵉⵕⵥⵎ ⵏ ⵢⴰⵏ ⴰⵎⵎⴰⵙ ⴰⵏⴰⵎⵓⵏ ⴰⵎⴰⵏⵓⵏ ⵏ ⵡⴰⴷⴰⵙ (2,4 ⵏ ⵓⵎⵍⵢⵓⵏ ⵏ ⴷⴷⵔⵀⵎ) ⴷ ⵜⵎⴷⵉⵏⵜ ⴰⴷ, ⴷ ⵢⴰⵏ ⵓⴷⴷⵉⵙ ⴰⵏⴰⵎⵓⵏ ⴱⵓ ⵜⵓⴳⵜ ⵏ ⵜⵡⵓⵔⵉⵡⵉⵏ (7,3 ⴰⵎⵍⵢⵓⵏ ⵏ ⴷⴷⵔⵀⵎ) ⴳ ⵍⵎⴷⵉⵏⵜ ⵏ ⵙⵓⵇ ⵙⵙⴱⵜ ⵡⵍⴰⴷ ⵏⵎⵎⴰ.
ⴰⴷⴷⵉⵙ ⴱⵓ ⵜⵓⴳⵜ ⵏ ⵉⴳⵔⵏ ⵏ ⵉⴼⴳⴰⵏⵏ ⵉⵟⵟⴰⴼⵏ ⵉⵙⵙⴰⵔⵏ ⵉⵥⵍⵉⵏ, ⵍⵍⵉ ⵔⴰⴷ ⵉⵜⵜⵓⵙⴽⴰⵔ ⴳ ⵓⵙⴰⵜⵉ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵜⵉⴳⵎⵉ ⵜⴰⵏⴼⴳⴰⵏⵜ ⴷ ⵔⴰⴷ ⵢⴰⵎⵥ ⵢⴰⵏ ⴰⵙⴰⵢⵔⴰⵔ ⵏ 414 ⴰⵎⵍⵢⵓⵏ ⴰⵎⴽⴽⵓⵥ. ⵔⴰⴷ ⵉⵜⵜⵓⵙⴽⴰⵔ ⴳ 12 ⵉⵢⵢⵓⵔⵏ ⴷ ⵔⴰⴷ ⴳⵉⵜ ⵉⵍⵉⵏ ⵜⵉⴷⴰⵍⴰⵏ ⵏ ⵓⵙⵎⵉⵍ, ⴷ ⵢⴰⵜ ⵜⵣⵇⵇⴰ ⵏ ⵜⵙⵏⵎⴰⵍⴰⵢⵜ, ⵜⵉⵙⴰⵡⵔⵉⵏ ⵏ ⴰⵙⵎⵓⵜⵜⴳ ⴷ ⵢⴰⵜ ⵜⴰⴷⴰⵍⴰ ⵏ ⵓⵙⵎⴳⵍ.
ⴰⵎⵎⴰ ⵡⵎⵎⴰⵙ ⴰⵏⴰⵎⵓⵏ ⴰⵎⴰⵏⵓⵏ ⵏ ⵡⴰⴷⴰⵙ, ⵉⵔⴰ ⴰⴷ ⵉⵙⴱⴷⴷⵉ ⵍⵉⵇⵚⴰ ⴰⵏⴰⵎⵓⵏ ⴳ ⵓⵎⵏⴰⴹ ⴰⵖⵔⵎⴰⵏ. ⵜⵓⵎⵥ ⵜⵓⵚⴽⵉⵡⵜ ⵜⴰⵎⴰⵢⵏⵓⵜ ⴰⴷ 3.717 ⴰⵎⵉⵜⵔⵓ ⴰⵎⴽⴽⵓⵥ, ⵜⵟⵟⴰⴼ ⴽⵕⴰⴹ ⵏ ⵉⴱⴰⵔⴰⵣⵏ ⵏ ⵜⵡⵊⵊⴰ ⵏ ⵓⴹⴰⵕ ⵉⵎⵥⵥⵉⵏ ⵏ ⵍⴳⴰⵥⵓⵏ ⵉⵚⵟⵉⵏⴰⵄⵉ, ⴷ ⵢⴰⵏ ⵓⵙⴰⵢⵔⴰⵔ ⵉⴳⴰⵏ ⵉ ⵜⵡⵊⵊⴰ ⵏ ⵍⵃⴷⵉⴷ ⴷ ⵜⴰⴷⴰⵍⴰ ⵏ ⵓⵙⵏⴼⵍ ⵏ ⵓⵕⵕⵓⴹ.
ⴰⵎⵎⴰ ⵡⵎⵎⴰⵙ ⴰⵏⴰⵎⵓⵏ ⴰⵎⴰⵏⵓⵏ ⵏ ⵡⴰⴷⴰⵙ ⵏ ⵍⵎⴷⵉⵏⵜ ⵏ ⵙⵓⵇ ⵙⵙⴱⵜ ⵡⵍⴰⴷ ⵏⵎⵎⴰ, ⵉⵜⵜⵓⵙⴽⴰⵔ ⴳ ⵓⵙⵜⵉ ⵏ « ⵉⵏⴷⵉⵢⴰⵛ », ⵉⵟⵟⴰⴼ ⵓⴷⴷⵉⵙ ⵢⴰⵜ ⵜⴷⴰⵍⴰ ⵏ ⵓⵙⵃⵙⵙⵉ ⴷ ⵏ ⵓⵙⵡⴰⵍⴰ, ⴷ ⵏ ⵉⵢⴰⴼⵓⵏ ⵏ ⵜⵉⵎⵙⵎⵓⵏⵜⵉⵏ ⵜⵉⴷⵖⵔⴰⵏⵉⵏ, ⴷ ⵏ ⵜⵙⵏⵎⴰⵍⴰⵢⵜ, ⴷ ⵏ ⵜⵓⵏⵏⵓⵏⵜ, ⴷ ⵏ ⵜⵉⵙⵓⵔⴰⵔⵉⵏ ⵏ ⵉⴼⵔⵅⴰⵏ, ⴷ ⵏ ⵓⵥⴰⵡⴰⵏ, ⴷ ⵏ ⵜⴰⵙⵎⵓⵏⵉ, ⴷ ⵏ ⵉⵎⵓⵙⵙⵓⵏ ⵢⴰⴹⵏⵉⵏ.
ⴳ ⵓⵣⵎⵣⵣⵓ ⵢⴰⴷ, ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵙⵓⵔⴰ ⵏ 10 ⵏ ⵉⵏⵙⵎⴰⴷⴷⵓⵏ ⵉⵎⵣⵣⵉⵏⵏ ⵏ ⵓⵙⵙⴰⵢ ⴰⵏⵎⵍⴰⵏ ⵉ ⵢⵏⵙⵙⵉⵅⴼⵏ ⵏ ⵜⵉⵎⵙⵎⵓⵏⵏ ⵉⴷⵖⵔⴰⵏⵏ.
ⵉⴼⴽⴰ ⵙⵓⵍ 600 ⴰⵣⵍⴰⵍⴰⵎ ⵉ ⵢⵏⵙⵙⵉⵅⴼⵏ ⵏ ⵜⵉⵎⵙⵎⵓⵏⵏ ⵏ ⵍⵡⴰⵍⵉⴷⴰⵢⵏ ⵏ ⵉⵏⵍⵎⴰⴷⵏ ⵍⵍⵉ ⵢⵓⵛⴽⴰⵏ ⵙⴳ ⴰⵎⵏⴰⴹ ⴰⴼⴰⵔⴰⵏ.
ⵉⴼⴽⴰ ⴷⴰⵖ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵙⵓⵔⴰ ⵏ ⵢⴰⵏ ⴰⵏⵙⵎⴰⴷⴷⵓ ⵏ ⴰⵙⵙⴰⵢ ⴰⵎⴰⵏⵓⵏ, ⴷ ⵏ ⵢⴰⵜ ⵜⵎⵙⵙⵓⴷⵓⵜ ⵏ ⵉⵎⵓⴹⴰⵏ, ⵎⴰⵢⴰⴷ ⵜⵙⵖⴰ « ⵉⵏⴷⵉⵢⴰⵛ » ⵙ 960.000 ⴷⴷⵔⵀⵎ, ⵉ ⵡⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵙⴳⴰⵡⴰⵏⵜ ⵏ ⵉⴳⵉⵏ ⵉⵏⴰⵎⵓⵏⵏ, ⵓⵍⴰ ⵜⵉⵙⵓⵔⴰ ⵏ ⵢⴰⵏ ⴰⵏⵙⵎⴰⴷⴷⵓ ⵏ ⴰⵙⵙⴰⵢ ⴰⵎⴰⵏⵓⵏ (2,18 ⴰⵎⵍⵢⵓⵏ ⵏ ⴷⴷⵔⵀⵎ).