ⵜⴰⵎⴱⵍⵜ ⴰⴷ, ⵉⵜⵜⵓⴼⴽⴰⵢⴰⵙ ⵡⴰⵜⵉⴳ ⵏ 369 ⵎⵍⵢⵓⵏ ⵏ ⴷⴷⵔⵀⴰⵎ, ⵉⴳⴰ ⴰⴳⵣⵣⵓⵎ ⴳ ⵓⵖⴰⵡⴰⵙ ⵏ ⵓⵙⴱⵉⴷ ⵏ ⵜⵣⴷⴷⵓⵖⵜ ⵏ ⵚⵚⴰⴼⴰ ⴳ ⵜⵙⴳⴰ ⵏ ⴹⴹⴰⵕⵍⴱⵉⴹⴰ, ⵍⵍⵉ ⵉⴽⴽⴰⵜⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⴼⴽⴰ ⵍⴱⴷⵓ ⵏ ⵜⵡⵓⵔⵉⵡⵉⵏ ⵏⵏⵙ ⴳ 07 ⴰⴱⵔⵉⵍ 2011, ⵎⴰⵢⴰⴷ ⵉⴽⵛⴰⵎ ⴳ ⵓⵏⵀⵍⵍⴰ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵎⵉⴷⴷⵏ ⵉⵀⵔⵛⴰⵏ, ⴰⴼⴰ ⴷ ⴰⴼⵉⵏ ⵜⴰⵣⴷⴷⵓⵖⵜ ⴳ ⵍⵍⴰⵏⵜ ⵜⵎⵙⵓⵜⴰⵍ ⵉⴼⵓⵍⴽⵉⵏ. ⴷ ⵢⵓⵛⴽⴰⴷ ⵜⵓⵙⴽⵔⴰ ⵏ ⵉⴳⵊⴷⵉ ⴰⴷ ⴰⵖⵔⵎⴰⵏ ⴰⵎⴰⵢⵏⵓ « ⵚⵚⴰⴼⴰ » ⴰⴼⴰ ⴷ ⵉⵙⴷⴷⵉⴷ ⵜⵓⴳⴳⵯⴰⵣ ⵉⵙⴽⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷⵜ ⵉⵃⴼⴰⴹ ⵕⴱⴱⵉ, ⵎⴰⵔ ⴰⴷ ⵉⵍⵍⵉⵏⵜ ⵜⵎⵏⴰⴹⵉⵏ ⵏ ⵜⵣⴷⴷⵓⵖⵜ ⵉⵖⵓⴷⴰⵏ ⴳ ⵜⵎⴰⵥⵓⵏⵜ ⵜⴰⴷⴰⵎⵙⴰⵏⵜ. ⵜⵓⵙⴽⵔⴰ ⵏ ⵜⵎⵀⵍⴰ ⵏ « ⵚⵚⴰⴼⴰ » ⵙ ⵙⴰ ⵏ ⵉⴳⵣⵣⵓⵎⵏ (61 ⵀⵉⴽⵜⴰⵔ), ⴳⵉⵙ ⵙⵎⵎⵓⵙ ⵜⴰⵎⵣⵡⴰⵔⵓⵜ ⵜⵓⵊⴰⴷ ⵉ ⵜⵓⴽⴽⵉ ⴳ ⵜⵍⵍⴰ 1461 ⵏ ⵓⴷⵖⴰⵔ ⵍⵍⵉ ⵔⴰⴷ ⵢⴰⵙⵉ 2922 ⵏ ⵜⴰⵡⵊⴰ ⵏ ⵎⵉⴷⴷⵏ ⵉⵣⴷⴰⵖⵏ ⴳ ⵚⵚⴰⴼⵉⵃ, ⴷ 154 ⵏ ⵓⴷⵖⴰⵔ ⵏ ⵓⵙⵉⴽⵙⴰⵍ, ⴷ 15 ⵏ ⵓⴷⵖⴰⵔ ⵉⵥⵍⵉⵏ ⵙ ⵉⵎⵓⵙⵙⵓⵜⵏ ⵏ ⵜⵙⴱⴱⴰⴱⵜ ⴷ 13 ⵏ ⵓⴷⵖⴰⵔ ⵏ ⵓⵎⴰⵡⴰ ⴰⴳⴷⵓⴷⴰⵏ, ⴳⵉⵙⵏ ⵚⴹⵉⵚ ⵏ ⵜⵓⵙⴽⵔⴰ (ⵙⵏⴰⵜ ⵜⵉⵎⴰⵍⵉⵏ , ⴷ ⵙⵉⵏ ⵉⴱⴰⵔⴰⵣⵏ, ⴷ ⵜⴳⴳⵯⵓⵎⵎⴰ ⵏ ⵉⵄⵔⵔⵉⵎⵏ). ⴷ ⵔⴰⴷ ⵉⵥⵕⴼ ⵅⴼ ⵓⵙⵏⵜⵉ ⴰⴷ ⵏ ⵜⵣⴷⴷⵓⵖⵜ ⵎⵉ ⴷⴰⵔ ⵜⵉⵏⴰⴼⵓⵜⵉⵏ ⵜⴰⵏⴰⵎⵓⵏⵜ ⵉⵖⵓⴷⴰⵏ, ⵜⵔⴰⴱⴱⵓⵜ ⵏ ⵍⵄⵓⵎⵕⴰⵏ, ⴷ ⵜⴼⵏⵉⵇⵜ ⵏ ⵜⵡⵉⵣⵉ ⵏ ⵜⵣⴷⴷⵓⵖⵜ ⴷ ⵜⵖⵔⵎⴰⵏ ⵙ ⵡⴰⵜⵉⴳ ⵏ 74 ⵎⵍⵢⵓⵏ ⴷⴷⵔⵀⴰⵎ, ⴷ ⵉⵎⵙⴱⵖⵔⵏ ⵙ 59 ⵎⵍⵢⵓⵏ ⵏ ⴷⴷⵔⵀⴰⵎ, ⴷ ⵎⴰⵢⴷ ⵢⴰⵖⵓⵍⵏ ⴳ ⵜⵓⵏⵣⵉⵜ ⵏ ⵉⴷⵖⴰⵔⵏ ⵙ ⵡⴰⵜⵉⴳ ⵏ 160 ⵎⵍⵢⵓⵏ ⵏ ⴷⴷⵔⵀⴰⵎ, ⴷ ⵜⵎⵙⴰⵙⵜⵍⴰⵜ ⵜⴰⵎⴰⵜⴰⵢⵜ ⵏ ⵓⵡⵏⴰⴽ ⵙ 76 ⵎⵍⵢⵓⵏ ⵏ ⴷⴷⵔⵀⴰⵎ. ⵙ ⵓⵣⵎⵣⵣⵓ ⴰⴷ, ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⵙⵍⴽⵉⵏ ⵏ ⵓⵙⴱⵖⵔ ⵉ ⵎⵔⴰⵡ ⵏ ⵎⵉⴷⴷⵏ ⵉⵙⴱⵖⵔⵏ ⴳ ⵜⵣⴷⴷⵓⵖⵜ ⵏⵏⵙ, ⴳ ⵓⵙⴰⵜⵉ ⵏ ⵓⴳⵣⵣⵓⵎ ⵡⵉⵙⵙ ⵙⵎⵎⵓⵙ ⵉⵎⵣⴳⵓⵔⴰ ⴳ ⵓⵙⵡⵉⵔ ⵏ ⵉⴳⵊⴷⵉ ⵏ « ⵚⵚⴰⴼⴰ » ⴰⵎⴰⵢⵏⵓ.